Талғар тауында сүйегі табылған адамның туыстары оның 20 жыл бұрын жоғалып кеткенін мәлімдеді

Беларусьтен келген туристер Алматы облысы Талғар ауданындағы Северцев мұздығы маңынан тапқан ер адамның денесі таудан түсірілгеннен кейін оның туыстары полицияға хабарласқан, деп хабарлайды Orda.kz.

Анықталғандай, мұздықтан табылған адамның денесі 19 жыл бұрын жоғалып кеткен ер адамға тиесілі болуы мүмкін. Оның қызы бұл туралы әлеуметтік желідегі парақшасында жазып, Беларусьтен келген туристерге үлкен алғыс білдірді.

Әйелдің айтуынша, оқиға туралы ол құрбысы жіберген әлеуметтік желідегі жарияланымнан білген.

«Таңертең құрбым маған рюкзактың суреті жарияланған жазбаны жіберіп, оның біздегі рюкзакқа қатты ұқсайтынын айтты. Суретке қарап, оның шынымен әкемнің рюкзагы екенін түсіндім. Себебі бұл кеңес дәуірінен қалған станокты рюкзак еді. Құтқарушылар бізге тергеушінің телефон нөмірін берді. Біз хабарластық. Ол бізден сақталған барлық құжаттар мен фотосуреттерді, соның ішінде әкемнің рюкзакпен түскен суреттерін жіберуді сұрады. Кейін тергеуші қайта қоңырау шалып, рюкзактың ішінен әкеме тиесілі аты-жөні жазылған куәлік табылғанын айтты», – деді әйел.

Еске салайық, 19 тамызда Беларусьтен келген туристер Северцев мұздығынан белгісіз адам сүйегін тапқанын хабарлаған болатын. Олар құтқарушыларға оқиға орнының координаттарын, фотолары мен бейнематериалда жіберген.

Осыдан кейін оқиға орнына  Төтенше жағдайлар министрлігінің қызметкерлері ұшып барды. Адамның денесі Алматы облысының  жедел-тергеу тобына тапсырылды.

Қазір мамандар қаза болған адамның жеке басын нақтылап, оның тауда қалай қаза тапқанын және 19 жыл бұрын жоғалуына қатысты мән-жайларды анықтап жатыр.

Оқи отырыңыз:

• Талғар тауында табылған туристің денесі полицияға тапсырылды
• Алматы облысындағы тауда шашылып жатқан адам сүйектеріне қатысты ТЖД мәлімет берді
• Шетелдік туристер Алматы облысындағы тауда шашылып жатқан адам сүйектеріне тап болды