Шетелдік туристер Алматы облысындағы тауда шашылып жатқан адам сүйектеріне тап болды

Беларусьтен келген туристер тобы Алматы облысы Талғар ауданындағы Северцов мұздығынан адам сүйектеріне ұқсайтын қалдықтарды тауып алған, деп хабарлайды Orda.kz.      

Туристер оқиға орнынан түсірілген фотоларды, бейнематериалдар мен нақты координаттарды төтенше жағдайлар қызметіне жолдаған. Алайда әзірге қалдықтарды таудан алып түсу мәселесі шешілмеген.

Бұл туралы Анастасия Ахметова әлеуметтік желідегі парақшасында хабарлады. Оның айтуынша, Беларусьтен келген туристер 16 тамызда екі аптаға созылған таулы бағыттағы сапардан келіп, мұздықтан түсірілген бейнежазбаны көрсеткен.

Ахметованың сөзінше, ол бірден 109 нөміріне хабарласқан. Өйткені 112 шұғыл қызметімен байланысу мүмкін болмаған. Кейін қызметкерлер берген байланыс нөмірі арқылы оқиға орнының координаттары, фотолары мен бейнежазбаларды мессенджер арқылы жіберген.

Автордың айтуынша, осы жолда мәйіттің жатқаны туралы ақпарат 2025 жылы ресейлік туристер тобының есебінде де кездескен. Осыған қарап, адам сүйектері мұздықта бір жылдан бері жатқан болуы мүмкін деген болжам жасалды. Осы уақыт аралығында олардың жанынан кемінде бірнеше туристік топ өтіп кеткен болуы ықтимал.

Ахметова сондай-ақ Беларусь туристері жолықтырған Санкт-Петербургтен келген туристер маңайда жатқан рюкзактың ішінен құжаттарды алып, оларды Төтенше жағдайлар министрлігі қызметкерлеріне тапсыруға ниет білдіргенін айтты. Алайда құжаттардың шынымен тиісті органдарға тапсырылған-тапсырылмағаны әзірге белгісіз.

Кейін Анастасия Ахметова Алматы облысының Төтенше жағдайлар департаментімен байланысқанын хабарлады. Оның айтуынша, ведомство өкілдері бұл ақпараттың полицияға берілгенін айтқан. Алайда құтқару жұмыстарын бастау үшін Төтенше жағдайлар департаменті полицияның ресми өтінішін күтіп отыр.

Жазба жаңартылған кезде мұндай ресми хат әлі түспеген. Ахметова құқық қорғау органдарынан марқұмның кім екенін анықтауды, сүйектерді мұздықтан түсіріп, туыстарына беруді сұрады. Қажет болған жағдайда марқұмның жеке басын анықтау үшін ДНҚ сараптамасын жүргізу керек деп есептейді.

Северцов мұздығы Алматы облысының Талғар ауданында, жетуі қиын биік таулы жерде орналасқан. Ауа райының нашарлығы мен қардың жатуы іздеу және эвакуация жұмыстарын қиындатуы мүмкін.

Қазір оқиғаның нақты мән-жайы, табылған қалдықтардың кімге тиесілі екені және оларды мұздықтан қашан алып шығу мүмкін болатыны анықталуда.

Оқи отырыңыз:

• Астанада 20 жыл бұрын жасалған кісі өлімі әшкереленді
• ХҚКО қызметкері қызметтік көлікпен кейуананы қағып, мерт қылды