Шымкентте Нұрайдың өлімі бойынша іс прокуратураға өтті, отбасы тергеу қорытындысымен келіспейді

Шымкентте 21 жастағы Нұрай Серікбайдың өліміне қатысты қылмыстық іс Шымкент қаласы прокуратурасына жолданды. Жәбірленуші тарап істі қосымша тергеуге қайтаруды талап етіп отыр. Олар тергеу барысында заңбұзушылықтар болғанын айтып, күдіктіге тағылған айыптардың бір бөлігі алынып тасталуы мүмкін деп алаңдайды, деп хабарлайды Orda.kz Otyrar.kz-ке сілтеме жасап.

Істің прокуратураға түскенін марқұмның ағасы мен отбасының адвокаты хабарлаған.

Отбасы өкілдері іс материалдарымен танысып, тергеу нәтижелерімен келіспейтіндерін мәлімдеді. Олардың айтуынша, тергеу барысында ұсынылған кейбір өтініштер қаралмаған, сондай-ақ іс материалдарында елеулі кемшіліктер бар.

«Іс материалдарын зерделегеннен кейін бізде бірқатар сұрақ туындады. Кейбір өтініштеріміз мүлде қаралмағанын білдік, бұған қоса тергеу барысында айтарлықтай кемшіліктер бар. Осы ескертулердің барлығын прокурорға жолданған шағымда көрсеттік. Онда анықталған барлық заңбұзушылықтарды атап өтіп, оларды жою үшін істі қосымша тергеуге қайтаруды сұрадық. Алайда бүгінгі күнге дейін шағымымызға жауап алған жоқпыз», — деді жәбірленуші тараптың адвокаты Аянхан Омаров. 

Осыған байланысты жәбірленуші тарап прокуратурадан істі қосымша тергеуге қайтаруды сұрап отыр.

Марқұмның туыстарын алаңдатқан тағы бір мәселе — тағылған айыптардың көлемі. Қазіргі таңда 28 жастағы күдіктіге аса қатыгездікпен жасалған адам өлтіру, сталкинг және некеге мәжбүрлеу баптары бойынша айып тағылған. Алайда марқұмның отбасы прокуратура тексерісі барысында айыптардың бір бөлігі қысқартылуы мүмкін деп қауіптенеді.

«Біз Бас прокуратурадан бұл істі жеке бақылауға алуды сұраймыз. Айыптаудың үш бап бойынша да толық сақталғанын талап етеміз, олар «Сталкинг», «Некеге мәжбүрлеу» және «Аса қатыгездікпен жасалған адам өлтіру» баптары. Іс материалдарын қарау барысында кейбір баптар өзгертілуі немесе алынып тасталуы мүмкін деп алаңдаймыз. Өйткені прокуратура бекітетін айыптау кейінгі сот процесіне тікелей әсер етеді», — деді Аянхан Омаров. 

Туыстары бұл істі ерекше бақылауға алу туралы өтінішпен Қазақстан Республикасының Бас прокуратурасына да жүгінген.

Қылмыс 2026 жылғы 11 қаңтарда кешке Шымкентте болды. Шымкенттегі Төлеметов көшесі мен Өтегенов көшесінің қиылысындағы жаяу жүргіншілер жолында болған қанды оқиға елді елең еткізді. Желіде тараған бейнеден қыздың қарсылық көрсетіп жатқанын, ал жігіттің оның артынан қуып, ұрып-соғып, пышақтап, қашып кеткенін көруге болады.

 Бейресми ақпаратқа қарағанда, марқұмның 11 жеріне пышақ сұғылған. Бетін тіліп тастаған. Оқиға орнында мерт болған 21 жастағы Нұрай Серікбай сол маңдағы көпқабатты тұрғын үйлердің бірінде отбасымен бірге өмір сүрген

Кейін ол оны ұзақ уақыт аңдып жүргені анықталды. Қыз полицияға жүгінген, бірақ онда тиісті түрде жауап бермеген. Кісі өлтірілгеннен кейін күдікті 13 қаңтарда Шымкенттен 10 шақырым жерде жасырынып жатқан жерінен ұсталды.

2026 жылғы сәуірде екі сараптаманың нәтижесі бойынша оның психикалық бұзылулары анықталғаны белгілі болды. Оны арнайы изоляторға мәжбүрлеп емдеуге жіберді. Дегенмен сараптама айыпталушыны есі дұрыс деп таныды.

2026 жылғы 22 қаңтарда Шымкент қаласы полиция қызметкерлеріне қатысты «Салғырттық» бабы бойынша қылмыстық іс қозғады. Оларды қудалауға қатысты шағымдарға қарамастан, қайғылы оқиғаның алдын алмаған деп айыптады.

Бүгінде Нұрай туыстары Бас прокуратурадан істі ерекше бақылауға алып, күдіктіні өмір бойына қамауды талап етуде.

Сондай-ақ Қазақстан президенті құқық қорғау органдарының іс-қимылына принципті баға беру және әділ тергеуді қамтамасыз ету қажеттігін көрсете отырып, жағдайға жария түсінік берді.

Оқи отырыңыз:

• «11 жеріне пышақ сұққан»: Шымкентте кісі қолынан қаза тапқан қыздың денесі туыстарына берілді
• Нұрай Серікбайдың өлімі: Сараптама айыпталушыны есі дұрыс деп таныды
• Нұрай ісі: Күдікті өмір бойына сотталуы мүмкін