Шерзат ісі бойынша аппеляциялық сот: Сакиевтің анасы тілшілерді балағаттағаны үшін кешірім сұрады

5 маусым күні сот Шерзат ісіндегі Равиль Сакиевті бұзақылық пен кісі өлтіруге оқталғаны үшін 20 жылға колонияға қамау жазасына кесті. Осы үкім жарияланғаннан кейін оның анасы Баян Сарманова айғай-шу шығарып, дау туғызған еді. Сол кезде оқиғаны жариялап жүрген журналистерге де ол дауыс көтеріп, балағаттаған болатын. Бүгін әйел сол қылығы үшін кешірім сұрады, деп хабарлайды Orda.kz.

Сол кездегі дөрекі сөздері үшін әйелге қоғамдық тәртіпті бұзды деген айып тағылып, айыппұл салынған еді.

Бүгін апелляциялық шағым қаралған кезде ол журналистерден өз қылығы үшін кешірім сұрап, олардың тек өз міндетін атқарып жүргенін мойындады.

«Эмоцияға беріліп, балағат сөздер айтқаным үшін дәл журналистерден кешірім сұраймын. Сіздердің бұл іске қатыстарыңыз да, кінәларыңыз да жоқ. Ол сіздердің жұмыстарыңыз. Ал мен бүгінгі аппеляциялық сотта қасақана адам өлтіру бабымен айыптап, 20 жылға соттағанына, сол 99 бапқа келіспеймін. Балам да келіспейді. Ол жерде бейнетаспада кімнің қолында пышақ болғаны көрініп тұр. Менің баламды дәлелденбеген деп прокуратура өзінің жазғанына өзі қайшы шығып жатыр. Баламды 293 баппен, бұзақылық жасады деп айыптағандарына келісемін.  Бүкіл сотта мен балалардан сұрап шықтым. Олар Равиль қайда бара жатқанын білген жоқ деді. Мен бүгінгі сотқа соны сұрап келіп тұрмын», — деді Равильдің анасы. 

Дегенмен, әйел әлі күнге дейін ұлы ешкімнің өміріне қастандық жасамағанын, оның кінәсі тек бұзақылықпен шектелетінін айтып отыр.

Айта кету керек, сот үкімі оқылған соң, сотталушылар өздері отырған орынның әйнегін ұрып, есігін теуіп, наразылық білдірді. Олардың ата-аналары мен жақындары осыдан кейін өре түрегеліп, айқайға басты.

Бұл оқиға қазақ қоғамын дүр сілкіндіріп, қызу талқыға түсті. Оқиға былтыр Талғарда 4 қазан күні болған еді. Бір топ адам, соның ішінде осы сотталушылар дүкен иесі Қаржаубаймен, ұлы Шерзатпен және ағасы Нұрғанатпен жанжалдасып, арты кісі өліміне ұласты. 16 жасар Шерзат қаза болды.

9 желтоқсан күні таңертең жасөспірім Шерзат Полаттың ағасы Нұрғанат Ғайыпбаевтың денесі марқұм Шерзаттың зиратының қасынан табылды. 12 қазан күні Азат ауылындағы марқұм болған Шерзаттың отбасының үйі өртеніп кетті.