Шахмұрат Мүтәліп ERG компаниясының 39,3% акциясын сатып алды

Шахмұрат Мүтәліптің Nature Energy Solutions Ltd. компаниясы Eurasian Resources Group компаниясының 39,3% акциясын сатып алды. Оның ішінде 18,6%-ын Патох Шодиевтен, ал 20,7%-ын Александр Машкевичтің мұрагерлерінен сатып алған, деп хабарлайды Orda.kz.       

ERG өкілдері топ құрамындағы барлық кәсіпорындар штаттық режимде жұмысын жалғастырып жатқанын атап өтті. Компания мәлімдеуінше, акционерлік капитал құрылымындағы өзгерістер бизнестің тұрақтылығын нығайтуға, корпоративтік басқарудың тиімділігін арттыруға және ұзақ мерзімді даму стратегиясын қолдауға бағытталған.

Сондай-ақ топ бұл мәміле өндірістік бағдарламаларға, қызметкерлер, серіктестер және мемлекет алдындағы міндеттемелерге әсер етпейтінін жеткізді.

Қазіргі таңда ERG акцияларының 40%-ы мемлекетке тиесілі. Тағы 20,7%-ына ERG негізін қалаушылардың бірі Әлижан Ибрагимовтың жесірі Мукадасхан Ибрагимова және оның ұлдары — Достан, Даврон, Шухрат пен Фурхат иелік етеді.

Еске салсақ, 2025 жылдың желтоқсанында Financial Times басылымы Шахмұрат Мүтәліптің ERG-дегі үлеске қызығушылық танытқаны туралы жазған еді. Басылым мәліметінше, қазақстандық кәсіпкер Шодиев пен Машкевич мұрагерлерінің үлестерін сатып алуды жоспарлап, олардың отбасыларымен 1,4 млрд доллар көлеміндегі мәміле шарттарын келіскен.

Дәл осындай ұсынысты ERG негізін қалаушылардың бірі Шухрат Ибрагимов те жасаған, алайда оның келіссөздері тығырыққа тірелген. Шахмұрат Мүтәліптің мәмілесі жүзеге асуы үшін Ибрагимов өз отбасының басым сатып алу құқығынан бас тартуы тиіс болған.

2026 жылдың қаңтарында мәміленің аяқталуы мүмкін екені туралы ақпарат тарағанымен, сол кезде ERG бұл мәліметті растаған жоқ. Компания өкілдері мұндай жағдайларда акционерлік құрылымдағы өзгерістер туралы ресми түрде хабарланатынын айтқан.

Шахмұрат Мүтәліп 2026 жылғы Forbes Kazakhstan нұсқасы бойынша Қазақстанның ең бай 75 бизнесмені рейтингінде 22-орында тұр. Басылым оны алғаш рет тізімге енгізіп, байлығын 482 миллион доллар деп бағалаған еді.
 
 Оқи отырыңыз:

• Forbes жариялаған Қазақстандағы 44 жасқа дейінгі ең бай сегіз бизнесмен кім?
• Қашқын миллионер Балушкин Ресей әскерлеріне Украинадағы соғысқа қажетті құрал-жабдық берді
• Еліміздің кәсіби футбол клубтарын жекешелендіру қалай жүріп жатыр?