Сарыөзекте 19 жасар сарбазды өлтірген офицер 7 жылға сотталды

Алматы гарнизонының әскери соты қызмет өкілеттігін асыра пайдаланғаны үшін офицер Жанбота Шәкіровті кінәлі деп тауып, жеті жылға бас бостандығынан айырды, деп хабарлайды Orda.kz.

Бұл қылмыс 19 жастағы Досымжан Сәлімжанның өмірін қиды. Жас сарбазды Құлсарыдан Жетісу облысының Сарыөзек ауылындағы № 29108 әскери бөліміне әскерге жіберген болатын. Оның денесінде ұрып-соғу іздері байқалғаннан кейін, сарбазды госпитальге жеткізген, бірақ ол он күн өткен соң көз жұмды.

Айыптаушы тарап Шәкіровтің әрекеті сарбаздың өліміне алып келді деп мәлімдеді. Сот залында марқұмның анасы Ардақ Имамғалиқызы офицердің қатаң жазаланғанын талап етті.

Алайда айыпталушы кінәсін мойындамай, оқиға туралы прокурорларға өзі хабарлағанын айтты.

Офицердің мойындамағанына қарамастан, сот оны лейтенант шенінен және жеті жыл бас бостандығынан айыруға шешім шығарды.

Бұл жайлы қоғам белсендісі Ринат Рафхат жазба қалдырды:

«Бүгін, әскердегі әлімжеттік салдарынан ауруханаға түсіп, 10 күннен кейін көз жұмған жас сарбаз Досымжан Сәлімжанның ісі бойынша айыпталған лейтенант Шәкіров ҚК 451-бап «Билiктi асыра пайдалану» 2-тармағымен 7 жыл бас бостандығынан айырылды», деп мәлімдеді Ринат Рафхат. 

Еске сала кетсек, Orda.kz Ақтау гарнизонының 25744 әскери бөліміне мерзімді әскери қызметін өтеуге жалғыз ұлын  жіберген отбасына баланың мүрдесі қайтқанын жазған болатын.

Ал 19 қыркүйекте Аягөз гарнизонының 10810 әскери бөлімінің лейтенанты Нұрсұлтан Алдамұратовтың денесі өзінің тұрғылықты жерінен табылды.

Ал 9 қыркүйекте міндетті мерзімді әскери қызметті жоюға шақыратын петиция жарияланды. Ол Қазақстан Республикасының Қорғаныс министрлігіне жолданып, жақында болған әскерилердің қайғылы оқиғаларына байланысты көтеріліп отыр.

Ал Қазақстан Қорғаныс министрлігі бейбіт уақытта әскерилердің қазасы мен әскердегі әлімжеттік туралы қоғамдағы пікірлер шындыққа жанаспайды деп есептейді. 

Еске сала кетсек, Orda.kz әскерден жарымжан болып қайтқан Ербаянның жақындарымен сұхбаттасқан болатын.