Сапарбаев: жарылыстан бүлінген үйлер екі айда қалпына келтіріледі

Жамбыл облысының әкімі Бердібек Сапарбаев Байзақ ауданындағы жарылыс салдарынан бүлінген үйлерді  қалпына келтіру жұмыстары туралы айтты.

Жарылыс болған аумақтағы жағдайға байланысты құрылған облыстық жедел штаб мүшелері арнайы мамандармен бірге зардап шеккен 3 елді мекендегі тұрғын үйлер мен әлеуметтік нысандар зерттеуде.

Облыс әкімі Бердібек Сапарбаевтың БАҚ өкілдеріне берген ақпараты бойынша, жөндеуді қажет ететін 118 жылжымайтын мүлік анықталып отыр; оның 106-сы – тұрғын үй, 12-сі – коммерциялық нысан.

Аумақтағы жөндеуді қажет ететін 106 үйдің 35-іне күрделі жөндеу тағайындалған. Облыстық жедел штаб қалған 71 үйді жеңіл зақымдалды деген қорытындыға келген.

— Ол үйлер де қалпына келтіріледі. Барлық жұмыстарға Үкімет тарапынан қаралатын және жергілікті бюджеттен қосымша бөлінетін қаражат жұмсалады. Өңірдегі демеушілер де қаржылай көмек көрсетеді. Бүгін бір үйдің күрделі жөндеу жұмыстары басталды. Қалған үйлерде құрылысшылар ертеңнен бастап іске кіріседі. Екі айдың ішінде барлық үйлерді қалпына келтіреміз деп  міндеттеме алып отырмыз. Оған біздің мүмкіндігіміз де, құрылысшылар күші де жеткілікті, – деді облыс әкімі.

Мемлекет басшысы Қасым-Жомарт Тоқаевтың тапсырмасын орындау аясында премьер-министр Асқар Маминнің өкімімен 26 тамызда Жамбыл облысының Байзақ ауданындағы оқ-дәрі қоймасында орын алған өрт пен жарылыс салдарын жою жөніндегі Үкіметтік комиссия құрылды.

Жамбыл облысының Байзақ ауданындағы оқ-дәрі қоймасы жарылысынан қаза тапқандардың саны 14-ке жетті.