Amanat өкілдері Adilet-ке қосылатынын ресми жариялады

Amanat партиясы Әdilet партиясымен бірікті. Бұл мәселе Астана қаласында өткен партия съезінде талқыланды, деп хабарлайды Orda.kz.

Amanat партиясының съезінде Әdilet партиясымен бірігу – саяси жүйенің табиғи дамуы ретінде аталды.

«Бүгінде елге жаңа бөліну  емес, жаңа бірігу жағдайы қажет. Осы жауапты сәтте біз бірігіп, ресурстарымызды жаңа саяси партия – Әdilet пртиясымен  ұштастыруымыз керек. Бір президентшіл күштің құрамында әділетті әрі прогрессивті Қазақстанды бірге құруды жалғастырамыз. Біз өз қағидаттарымыздан, сенімдерімізден және идеяларымыздан бас тартпаймыз. Керісінше, оларды одан әрі күшейтіп, мүмкіндіктерін кеңейтіп, жаңа даму деңгейіне шығарамыз», – деді Мәжіліс төрағасы Ерлан Қошанов. 

Ал Мәжіліс депутаты, Amanat партиясының өкілі Үнзила Шапақ ықтимал бірігу қоғам мен мемлекет мүддесіне жұмыс істейтін саяси күштерді күшейтетінін айтты.

Оның сөзінше, қазіргі кезеңде ел мүддесі, тұрақтылық пен даму саяси келіспеушіліктерден жоғары тұруы тиіс.

«Әр партияның өз ұстанымы мен ерекшелігі бар. Алайда бізді біріктіретін ортақ құндылықтар әлдеқайда маңызды. Бұл – жаңа Конституцияда бекітілген әділетті мемлекет құру қағидаты, тәуелсіз Қазақстанның тұрақтылығы, қауіпсіздігі, азаматтардың әл-ауқаты және келешек ұрпақтың болашағы. Сондықтан бұл қадам – саяси жүйенің табиғи дамуы және ел мүддесіне қызмет ететін күштердің ортақ мақсат жолында біріге алу қабілеті», – деді депутат. 

Ол партиялардың бірігуін саяси жүйенің дамуындағы заңды кезең деп санайды. Айтуынша, Amanat реформаларды бірлесіп жалғастыруға, қоғам сенімін нығайтуға және елдің дамуына жұмыс істеуге дайын.

Жалпы, съезге қатысушылар бұл бастаманы қолдады.  Партия съезінде  шешім қабылданды. 

Жиын кезінде мұндай қадам «Қазақстан дамуының стратегиялық міндеттемелерін сәтті жүзеге асыру үшін жинақталған тәжірибе, кадрлық және қоғамдық әлеуетті біріктіруге мүмкіндік беретіні» айтылды.

Партия төрағасы Ерлан Қошановтың түсіндіруінше, кейінгі жылдардағы өзгерістерге қарамастан халықтың санасында әлі күнге дейін «партияның өткеніне қатысты ассоциациялар» бар. Қазір Amanat дамудың жаңа кезеңіне шықты, елге бірлік пен ынтымақ қажет деді ол.

Оқи отырыңыз:

• Еліміздегі «Aманат» пен «Әділет» партиялары біріге ме?
• Тоқаев: Екі ел тату, «Қазақ-қырғыз – бір туған»
• Құрылыс кодексі: Әкімдіктер заңсыз құрылысты анықтауға міндетті