Петропавлда 77 жастағы зейнеткер 7 миллион теңгесін бизнеске «шақырған» алаяқтарға аудара салған

Петропавл қаласының 77 жастағы тұрғыны интернет-алаяқтарға алданып, 7 миллион теңгеден астам қаржысынан айырылды, деп хабарлайды Orda.kz.       

Зейнеткердің айтуынша, ол Instagram әлеуметтік желісінен инвестиция арқылы тез табыс табу туралы жарнаманы көріп, сілтеме арқылы өтіп, байланыс деректерін қалдырған.

Осыдан кейін оған алаяқтар хабарласып, жоғары табыс әкелетін бизнеспен «таныстырып» жобаға ақша салуға көндірген. Сәуір айының соңынан мамыр айының басына дейін әйел өзінің барлық жинаған 7 миллион теңгеден астам қаражатын олардың есепшоттарына аударған.

Алайда біраз уақыттан кейін алаяқтар байланысқа шықпай қойған соң, зейнеткер полицияға жүгінген.

Алаяқтық фактісі бойынша қылмыстық іс қозғалып, тергеу басталды. Полицейлер қазірдің өзінде ақшаны шетелге шығарған үш дропперді, яғни өздерінің банктік шоттарын пайдалануға берген адамдарды анықтады.

Зейнеткерге келтірілген материалдық шығынды өндіру үшін сот арқылы өтемақы талап ету мүмкіндігі берілді.

Оқи отырыңыз:

• Көлік прокуратурасы: Қаруыңды тапсырып — тыныш ұйықта
• Тағы да жеке клиника: Астанада запастағы полковниктің ота алдында жүрегі тоқтап қалды
• Алматыда сегіз жылға жуық тоқтап қалған Сайын көшесінің жалғасы ашылды