Алматыда сегіз жылға жуық тоқтап қалған Сайын көшесінің жалғасы ашылды

Алматыда Сайын көшесінің жаңа учаскесі бойынша қозғалыс ашылды. Ұзындығы 3,2 шақырым болатын жол бөлігі қазірдің өзінде автокөлік жүргізушілеріне қолжетімді, деп хабарлайды Orda.kz.       

Қала әкімдігінің мәліметінше, Сайын көшесін Рысқұлов даңғылынан Мөңке би көшесіне дейін ұзарту жобасы 2018 жылдан бері кезең-кезеңімен жүзеге асырылып келген.

Қазіргі уақытта жолдың жүру бөлігінде асфальтбетон жабынының төменгі қабаты төселген. Негізгі құрылыс-монтаж жұмыстары аяқталғаннан кейін жолшылар асфальттың үстіңгі қабатын төсеуге кіріседі.

Сонымен қатар жаңа магистраль бойында инфрақұрылымды дамыту жұмыстары қатар жүргізілуде. Атап айтқанда, қосалқы жолдар, жаяу жүргіншілер жолы мен веложолдар салынып, айналасы абаттандырылуда.

Жұмыстың жалғасуына байланысты аталған учаскеде уақытша жылдамдық шектеуі енгізіліп, 40 шқ/сағ деңгейінде белгіленген. Жүргізушілерден жол белгілерін сақтап, жол қозғалысы ережелерін қатаң ұстану сұралады.

Жаңа жол учаскесінің ашылуы қала аудандары арасындағы көлік қатынасын жақсартып, көршілес магистральдарға түсетін жүктемені азайтады деп күтілуде.

Оқи отырыңыз:

• Көкшетауда жол талғамайтын көлік жайбарақат кетіп бара жатқан әйелді жаншып өтті
• Қазақстанда 11 мыңнан астам жол белгілері орнатылады
• 2026 жылы алты жаңа бағытта ақылы жол іске қосылады