Перизат Қайраттың көліктері мемлекеттік органдарға тегін берілді

Перизат Қайраттың тәркіленген көліктері құқық қорғау органдарына берілді. Мемлекеттік қызметкерлер мұндай көліктерді қандай жағдайда және не үшін алатынын Мемлекеттік мүлік және жекешелендіру комитеті төрағасы  Нұрмахан Әділбеков  түсіндірді, деп хабарлайды Orda.kz.       

Оның Tengrinews.kz тілшісіне айтуынша, мемлекеттік органдар люкс санатындағы активтерді толықтай тегін ала алады. Алайда бұл тек бір жағдайда жүзеге асады, егер көліктер аукционда сатылмай қалған болса ғана.

«Бұл шара бюджет қаражатын үнемдеу үшін қарастырылған. Жаңа көліктерді сатып алғаннан гөрі, тәркіленген мүлікті пайдалану тиімді. Құқық қорғау және мемлекеттік органдарға мұндай құқық нормативтік-құқықтық актілермен бекітілген», — деді Нұрмахан Әділбеков. 

Бұған дейін Перизат Қайраттан тәркіленген 2024 жылғы қара түсті Mercedes-Benz S 450 мемлекет меншігіне өткен болатын. Құжаттарға сәйкес, көліктің қуаттағышы отырып қалғандықтан, техникалық жағдайын тексеру мүмкін болмаған.

2025 жылдың қыркүйегінде Қаржылық мониторинг агенттігі тәркіленген мүліктер аукционға шығарылатынын хабарлаған болатын.

Тәркіленген активтердің қатарында:

• Vela Village коттедж қалашығындағы жеке үй;
• Akbulak Riviera, Sensata Plaza, Highvill Ishim Gold және «Көк Жайлау» тұрғын кешендеріндегі пәтерлер;
•  Lexus LX 600, Mercedes-Benz EQE, Haval H6 GT көліктері;
• гүл бизнесіндегі 100% үлес;
• 97 миллион теңгеден астам қаражат және 22 мың доллар қолма-қол ақша болған.

Сонымен қатар, әлемдік брендтердің күннен қорғайтын көзілдіріктері, аяқкиімдері мен аксессуарлар да тәркіленген.

Перизат Қайрат 2024 жылдың қарашасында 1,5 миллиард теңгені жымқырды деген күдікпен ұсталған. Бұл қаражат су тасқынынан зардап шеккендерге көмек ретінде жиналған. Тергеу мәліметінше, Перизат Қайрат мемлекетке 3,5 млрд теңге көлемінде шығын келтірген. Ұрланған қаржыға сатып алынған 865 млн теңгенің мүлкіне тыйым салынды.

Тергеу нұсқасына сәйкес, қаражаттың бір бөлігі жеке қажеттіліктерге — элиталық жылжымайтын мүлікке, көліктерге және шетелдік сапарларға жұмсалған. Ақшаны қолма-қол ауыстыру үшін ол туыстарын тартқан. Іс бойынша оның анасы Ғайни Алашбаева да күдікті ретінде өткен.

Кейін Перизат Қайрат Палестина тұрғындарына арналған гуманитарлық көмек қаржысын да жымқырды деген күдікке ілінді.

2025 жылдың наурызында оның Biz Birgemiz Qazaqstan 2030 қоры сот шешімімен таратылды.

Сот барысында жәбірленушілер әлеуметтік желілердегі жарнамаға сеніп, қайырымдылық көмек көрсеткендерін айтқан. Тергеу кезінде тәркіленген мүліктер тізімі де жария етілді.

Нәтижесінде, Перизат Қайрат 10 жылға бас бостандығынан айырылып, орташа қауіпсіздік мекемесінде жазасын өтейтін болды. Оның анасы Ғайни Алашбаева 7 жылға сотталды.

Оқи отырыңыз:

• 3,5 млрд теңге мен 109 том: Перизат Қайрат ісі прокуратураға жолданды
• Перизат Қайратпен байланысы бар: Бірнеше құрылыс компаниясын басқарған Мөлдір Сүйіншәлі үйқамақта
• Перизат Қайраттың жыры осымен тәмам: Үкім өзгеріссіз қалды