Перизат Қайратпен байланысы бар: Бірнеше құрылыс компаниясын басқарған Мөлдір Сүйіншәлі үйқамақта

Астанада бірнеше құрылыс компаниясының басшысы Мөлдір Сүйіншәлі  алаяқтық ісі бойынша тергеліп жатыр, деп хабарлайды Orda.kz. 

ҚМА мәліметінше, 2021–2024 жылдар аралығында Мөлдір Сүйіншәлі  «Nura Elite» коттедж қалашығын салу сылтауымен азаматтардан қаражат жиған.

Жоба аясында 37 коттедж және 24 таунхаус салу көзделген. Алайда бүгінгі күні таунхаустар толық аяқталмаған. 2023 жылдың 4-тоқсанына дейін аяқтау жөніндегі міндеттемелер орындалмаған.

56 адам жәбірленуші ретінде танылып, тартылған қаражаттың жалпы сомасы 3,9 млрд теңге болды. 

Сондай-ақ бір жылжымайтын мүлікті бірнеше рет сату фактісі анықталған. 

Үлескерлердің қаражатының бір бөлігі Астана қаласында «Асылхан» тұрғын үй кешенін салуға арналған жертелімін сатып алуға жұмсалғаны белгілі болды. 

Сонымен қатар, құрылысқа қажетті рұқсат құжаттары болмағанына қарамастан, ол Перизат Қайраттың «Біз біргеміз» қайырымдылық қоры арқылы бұқаралық ақпарат құралдарында мұқтаж әйелге пәтер берілетіні туралы мәлімдеген. Алайда іс жүзінде тұрғын үй кешенінің құрылысы басталмаған.

Сот санкциясымен Мөлдір Сүйіншәліге үй қамақ түріндегі бұлтартпау шарасы қолданылды.

Тергеу жалғасуда.

Оқи отырыңыз:

• Ерлі-зайыпты блогер Жанәбілевтерге сот үкімі шықты
• Депутат Базарбек эмоциясын тежей алмай, «Болашақ» жүйесін қатаң сынға алды