Парламент сайлауы референдумнан да қымбатқа түсуі мүмкін

Қазақстандағы парламент сайлауы референдумнан қымбатқа түсуі мүмкін. Бұл туралы Орталық сайлау комиссиясының хатшысы Шавкат Өтемісов мәлімдеді, деп хабарлайды Orda.kz.

Оның айтуынша, нақты қанша қаражат жұмсалатына әзірге белгісіз, алайда көп нәрсе сайлау науқанының өткізілу күніне байланысты.

«Қазір нақты сандарды атай алмаймыз, бірақ қымбатырақ болады деп ойлаймыз. Біз Құрылтай сайлауының күнін анықтауымыз керек. Соған байланысты сайлауға дайындық қанша күнге созылатыны және комиссия мүшелері қанша уақыт жұмыс істейтіні белгілі болады. Бұл олардың жалақысына тікелей әсер етеді. Қаражаттың едәуір бөлігі дәл осы комиссия мүшелерінің еңбекақысына жұмсалады, ал олардың саны ел бойынша 70 мыңнан асады», — деді Өтемісов. 

Премьер-министрдің орынбасары – ұлттық экономика министрі Серік Жұманғарин де Құрылтай күні белгіленгеннен кейін нақты кететін қаржы есептелетінін айтты.

«Бұл көтеруге болатын сома, және ол алдыңғысынан айтарлықтай ерекшеленбейді. Барлық қаражат республикалық бюджеттен бөлінеді», — деп толықтырды Жұманғарин. 

Еске салайық, биылғы өткен референдумға 21 млрд теңге бөлінген болатын.

Бұған дейін Қазақстанда жақын арада электронды дауыс беруді енгізу жоспарланбайтынын Орталық сайлау комиссиясының хатшысы Шавкат Өтемісов айтқан болатын.

Оқи отырыңыз:

• Елімізде әкімдерді сайлау ережелері өзгереді
• ОСК: Қазақстанда жақын арада электронды дауыс беру енгізілмейді
• Парламент вице-президенттің өкілеттігін түсіндірді