Парламент алты Конституциялық заңды қабылдады

Бүгін Парламент палаталарының бірлескен отырысында депутаттар екінші оқылымда алты Конституциялық заңды қабылдады, деп хабарлайды Orda.kz.       

Екінші оқылымда алты Конституциялық заң:

•  «Қазақстан Республикасының Президенті туралы»
• «Қазақстан Республикасының Құрылтайы және оның депутаттарының мәртебесі туралы»
• «Қазақстан Халық Кеңесі туралы»
• «Қазақстан Республикасы астанасының мәртебесі туралы»
• «Қазақстан Республикасының әкімшілік-аумақтық құрылысы туралы»
• «Бірқатар конституциялық заңдарды Конституцияға сәйкестендіру туралы»

Парламент жаңартылған Конституция аясында әзірленген «Қазақстан Республикасының Президенті туралы»  конституциялық заңды екінші оқылымда мақұлдады. 

Құжатта президент мемлекеттің ең жоғары лауазымды тұлғасы ретінде айқындалып, билік тармақтарының келісімді жұмыс істеуін қамтамасыз ететін, сондай-ақ Конституцияның, азаматтардың құқықтары мен бостандықтарының және халық бірлігінің кепілі ретінде белгіленеді.

Заңда кезектен тыс сайлау институтының жойылуына байланысты президентті сайлау тәртібі, ант беру рәсімі және өкілеттік мерзімі нақтыланған.

Парламент Құрылтай және Қазақстан Халық Кеңесі туралы конституциялық заңдарды  екінші оқылымда қабылдады.     

Мәжілістің баспасөз қызметінің мәліметінше, «Қазақстан Республикасының Құрылтайы және оның депутаттарының мәртебесі туралы» конституциялық заң жаңартылған Конституция нормаларын іске асыру мақсатында әзірленген. Бұл Конституция 2026 жылғы 15 наурызда өткен республикалық референдумда қабылданған болатын.

Құжат бір палаталы парламент – Құрылтайдың конституциялық-құқықтық негіздерін бекітеді. Сонымен қатар оның мемлекеттік билік жүйесіндегі орны, қызметінің қағидаттары, құрылымы, қалыптасу тәртібі және өкілеттіктерін жүзеге асыру тетіктері айқындалады.

Жаңа заң шығарушы орган 5 жыл мерзімге сайланатын 145 депутаттан тұрады. Заңда олардың мәртебесі, құқықтары мен міндеттері, депутаттық бірлестіктер құру тәртібі, парламенттік көпшілік пен оппозиция институттары, сондай-ақ депутаттық әдеп нормалары белгіленген.

Оқи отырыңыз:

• Парламент президент туралы заңды екінші оқылымда бекітті
• Парламент Құрылтай мен Қазақстан Халық Кеңесі туралы заңдарды екінші оқылымда қабылдады
• Түркиядан Жәнібек хан туралы 1350 жылы жазылған қолжазба жеткізілді