Парламент президент туралы заңды екінші оқылымда бекітті

Парламент жаңартылған Конституция аясында әзірленген «Қазақстан Республикасының Президенті туралы» конституциялық заңды екінші оқылымда мақұлдады, деп хабарлайды Orda.kz.       

Құжатта президент мемлекеттің ең жоғары лауазымды тұлғасы ретінде айқындалып, билік тармақтарының келісімді жұмыс істеуін қамтамасыз ететін, сондай-ақ Конституцияның, азаматтардың құқықтары мен бостандықтарының және халық бірлігінің кепілі ретінде белгіленеді.

Заңда кезектен тыс сайлау институтының жойылуына байланысты президентті сайлау тәртібі, ант беру рәсімі және өкілеттік мерзімі нақтыланған.

Заңнамадағы жаңа элементтердің бірі – Қазақстан Республикасының вице-президенті институтын енгізу. Вице-президент президенттің тапсырмасы бойынша әрекет етіп, мемлекеттік органдармен және өзге де құрылымдармен қарым-қатынаста оның атынан өкілдік етеді.

Сондай-ақ заң президенттің Құрылтаймен және басқа да билік институттарымен өзара іс-қимылын реттейді. Өкілеттіктерді бөлу жүйесі тежемелік әрі тепе-теңдік механизмдерін нығайтуға және мемлекеттік басқарудың тиімділігін арттыруға бағытталған.

Оқи отырыңыз:

• Тоқаев: «Тағдыршешті сәтке куә болдық»
• Заң жобасы –  еліміздегі вице-президенттің өкілеттігі қандай болады?
• Тоқаев қолданыстағы Конституцияны сынамауға шақырды