Қостанайда су тасқыны кезінде трактор аударылып, үш адам көз жұмды

Қостанай облысында трактор су астына кетті. Оның ішінде төрт адам болған, деп хабарлады Orda.kz Qostanai.Media сайтына сілтеме жасап.

Қайғылы оқиға 13 сәуірде Қарасу ауданының Илличевск ауылдық округінде болды. Жергілікті ЖШС-тердің бірінің К-700 тракторы жыраға батып кетті.

Трактор ішінен бір адам ғана шыға алды. Қалған үшеуі суға кетіп, мерт болды.

Қарасу ауданы әкімінің орынбасары Ерлан Балжақаев трактор есігі тұрған жаққа құлағанын айтты.

– Қазіргі заманғы К-700-дің бір ғана есігі бар, ол жабылып қалған, - деп атап өтті әкім орынбасары.