Олимпиада-2026: Михаил Шайдоров жарысқа киген костюмін музейге тапсырды

Қазақстандық мәнерлеп сырғанаушы Михаил Шайдоров Олимпиада-2026 ойындарында еркін бағдарламада өнер көрсеткенде киген костюмін Олимпиада музейіне табыстады. Салтанатты рәсім Миландағы Коньки спорты үйінде өтті, деп хабарлайды Orda.kz Қазақстан Республикасы ҰОК-іне сілтеме жасап.

Іс-шараға Халықаралық конькишілер одағының басшысы Ким Чжэ Ёль, Олимпиада музейі директорының орынбасары Ясмин Майхтри, сондай-ақ Қазақстан ҰОК президенті Геннадий Головкин қатысты. Ол өз сөзінде Михаил Шайдоровтың тарихи жеңісі Қазақстанның мәнерлеп сырғанаудан алған алғашқы олимпиадалық алтыны екенін еске салды.

Спортшының өзі де костюмді музейге табыстау сәті ол үшін айрықша маңызды екенін айтты.

«Бұл костюм — біздің олимпиадалық арманға жету жолымыздың символы. Сондықтан енді оның әлемдік олимпиадалық қозғалыстың экспонаттары қатарында Қазақстан спортының тарихын паш ететіні қуантады. Ол олимпиадалық арман шекарасыз екенін, әрбір спортшы ұлы олимпиадалық тарихтың бір бөлігі бола алатынын білдіретін нышанға айналсын», — деді Шайдоров. 

Айта кетейік, спортшы бұл костюммен Олимпиадаға дейін де, Гран-при финалында мұз айдынға шыққан. Ойын алдында қазақстандық дизайнерлермен бірлесіп, киім үлгісі жетілдірілді: ғарыш кеңістігі мен «Пятый элемент» фильмінің атмосферасынан шабыт алған қою көк түс таңдалды. Михаил еркін бағдарламасын дәл осы фильмнің әуенімен орындаған. Образ жұлдызды аспан әсерін беретін жылтыр тастармен сәнделген.

Еске салсақ, Михаил Шайдоров Италияда өткен Олимпиада-2026 ойындарында алтын медаль жеңіп алып, ел тарихындағы қысқы спорт түрлері бойынша екінші Олимпиада чемпионы атанды.

Оқи отырыңыз:

• Тоқаев Михаил Шайдоровты «Барыс» орденімен марапаттады
• «Отаныма разымын»: Шайдоров Қазақстан халқына ризашылығын білдірді
• Қазақстанға тарихи жеңіс сыйлаған Михаил Шайдоровты әлем құттықтап жатыр