Олимпиадада Шайдоров мәнерлеп сырғанаудан сенсациялық жеңіске жетті

Бұл Қазақстан тарихындағы мәнерлеп сырғанаудан алған алғашқы Олимпиада алтыны, деп хабарлайды Orda.kz.      

21 жастағы Шайдоров қысқа бағдарлама (92,94 балл) мен еркін бағдарлама (198,64 балл) қорытындысы бойынша жалпы 291,58 балл жинады. Қысқа бағдарламадан кейін ол тек бесінші орында тұрып, турнирдің басты фавориттерін алға жіберген болатын.

Күміс жүлдені жапониялық Юма Кагиама (280,06 балл) иеленсе, қола медальды оның отандасы Сюн Сато (274,90 балл) жеңіп алды.

Шайдоров жарыс тарихында алғаш рет үштік аксель – төрттік тулуп каскадын сәтті орындаған мәнерлеп сырғанаушы атанды.

Бұл турнирдің басты фавориті ретінде әлемнің екі дүркін чемпионы, америкалық Илья Малинин саналған. Ол қысқа бағдарламадан кейін көш бастап тұрғанымен, еркін бағдарлама кезінде екі рет құлап қалды. Нәтижесінде Малинин 264,49 балмен сегізінші орынға тұрақтады.

Миланда бейтарап мәртебемен өнер көрсеткен ресейлік Петр Гуменик алтыншы орын алды.

Ерлер арасындағы жекелей мәнерлеп сырғанаудан Олимпиаданың сенсациялық жеңімпазы тек қазақстандық Михаил Шайдоров атанды.

Жұма күні Италияда өткен Олимпиада ойындарында барлығы жеті медаль жиынтығы сарапқа салынды. Осы ойындарда Ұлыбритания құрамасының алғашқы алтын медалін скелетоншы Мэтт Уэстон жеңіп алды. Ал норвегиялық шаңғышы Йоханнес Клебо классикалық стильдегі спринтте топ жарып, өз еліне сегізінші алтын жүлде әперді.

Еске салсақ, бұған дейін Қазақстан атынан тек Денис Тен ғана спорттың осы түрінен медальға ие болған еді.

Оқи отырыңыз:

• Еліміз мәнерлеп сырғанаудан әлемдік рейтингтің көш басында
• «Денис Теннің өлімі»: Жоғарғы сот шағымды кейінге қалдырды
• Еліміздің конькиші қыздары Олимпиада-2026 ойындарында үздік ондыққа енді