Нығматулиннің ұлына қатысты тың деректер пайда болды

Мәжілістің бұрынғы төрағасы Нұрлан Нығматулиннің ұлы Нұрхан Нұрланов қылмыстық іс бойынша тергеліп жатыр.

Бас прокуратураның хабарлауынша, «Қазфосфат» басшылығына қатысты 697 млн теңге монополиялық кіріс алуға байланысты сотқа дейінгі тергеу басталған.

– «Қазфосфат» ЖШС басшылығына қатысты 697 млн теңге сомасына монополиялық кіріс алуға байланысты сотқа дейінгі тергеу басталды, – делінген хабарламада.

Еске салайық, 15 шілдеде Мәжілістің экс-спикері Нұрлан Нығматулиннің ұлының қылмыстық іске қатысы бар екені белгілі болды. Бұған дейін, 5 сәуірде монополияға қарсы қызметкерлер «Қазфосфат» ЖШС-ға қатысты сұранысқа ие ауыл шаруашылығы тыңайтқыштарының бірінің бағасын негізсіз көтеру фактісі бойынша тергеу басталғаны туралы мәлімдеді.

Айта кетейік, ауыл шаруашылығы тыңайтқыштарының бағасы елдегі тамақ өнімдерінің құнына тікелей әсер етеді. 14 шілдеде Үкіметтің кеңейтілген отырысында Қасым-Жомарт Тоқаев «Қазфосфаттың» заңсыз кірісі туралы айтты.