Нұрай Серікбайға аяусыз сілтенген пышақ: Сот-медициналық сарапшы кәсіби баға берді

Шымкентте Нұрай Серікбайдың өліміне қатысты сот отырысында сот-медициналық сарапшы сөз сөйлеп, марқұмға салынған пышақ жарақаттары туралы түсініктеме берді. Бұл туралы «Жетінші арнаға» сілтеме жасай отырып Orda.kz хабарлайды. 

Телеарна мәліметінше, соңғы сот отырысында айыпталушы Шерхан Аймаханның биыл мамыр айында тергеу изоляторында берген бейнежазбадағы жауаптары тыңдалған. Онда ол марқұмға қанша рет пышақ салғанын айтқан.

«Есімде, Нұрайға 7 немесе 8 рет пышақ жарақатын салдым. Соққыны жалғастырғаным есімде, бірақ болған жағдайды толық білмеймін. Есімді жиғанда қайда кеткенімді түсінбедім, белгісіз бір жерде болдым», — деген еді айыпталушы. 

Ал қызға салынған жарақаттарға сотта сот-медициналық сарапшы кәсіби тұрғыда баға берді. Оның айтуынша, ең ауыр әрі өлімге әкелуі мүмкін жарақаттар кеуде қуысы мен іш қуысына өткен терең жарақаттар.

«Барлық жарақат кеуде және іш қуысына өтіп, ішкі ағзаларды зақымдаған. Жалпы 8  жарақат ішке өткен. Алайда қорытындыда жарақат саны 8-ден көп көрсетілген, себебі мойын мен қан тамырларындағы зақымдар мойын бұлшықеттері жарақатына жатады. Жарақаттардың тереңдігін ескерсек, олардың өте қатты күшпен салынғанын айтуға болады», — деді сот-медициналық сарапшы Жанболат Пернебеков.

Сондай-ақ сот 19 томнан тұратын қылмыстық іс материалдарын зерттеуді аяқтағаны белгілі болды. Сот жарыссөзі 11 тамызға белгіленген.

Еске салайық, қайғылы оқиға 11 қаңтар күні Шымкентте болған. Айыпталушы Шерхан Аймаханға кісі өлтіру, қудалау (сталкинг) және некеге мәжбүрлеу баптары бойынша айып тағылған.

Прокурор сотта қылмыстың мән-жайын қамтыған айыптау актісін оқыды. Тергеу деректеріне сәйкес, Нұрай Серікбайға жалпы саны 35 пышақ жарақаты салынған.

Шілде айының басында Нұрай Серікбайдың өліміне қатысты қылмыстық іс Шымкент қаласы прокуратурасына жолданды. Жәбірленуші тарап істі қосымша тергеуге қайтаруды талап етіп, тергеу барысында заңбұзушылықтар болғанын айтып, күдіктіге тағылған айыптардың бір бөлігі алынып тасталуы мүмкін деп алаңдайтындарын айтты.

Марқұмның отбасы айыпталушыдан 10 млрд теңгеден астам материалдық және моральдық өтемақы талап еткен. Бұған дейін Нұрай Серікбайдың ата-анасы оның өліміне қатысты сотта куәлік беріп, «Әке, мені алып кетші» дегенін айтқан болатын.

Оқи отырыңыз:

• «Әке, мені алып кетші»: Нұрай Серікбайдың әкесі сотта қызының соңғы сөзін айтты
• Шымкентте Нұрайдың өлімі бойынша іс прокуратураға өтті, отбасы тергеу қорытындысымен келіспейді
• Прокурор Нұрай Серікбайға 35 рет пышақ салынғанын мәлімдеді