Мұрат Әбенов: Кәсіпкерлік кодекс өзгерді, адамдар қаза тауып жатқан клиникаларды тексеру қажет

Мәжіліс депутаты Мұрат Әбенов екі резонансты өлімнен кейін пластикалық ота жасайтын клиникаларды тексеруді талап етті, деп хабарлайды Orda.kz.       

Оның айтуынша Қазақстандағы клиникалар мен зертханаларды тексеру қажет. Ол косметологиялық процедуралардан кейін адамдардың қаза болып жатқанын еске салды.

Депутаттың айтуынша, бұған дейін Кәсіпкерлік кодексіндегі шектеулерге байланысты бірқатар жеке медициналық ұйымдарды толыққанды тексеру мүмкін болмаған. Алайда кейін бұл нормалар қайта қаралған.

«Кейбір олигархтар медицина саласына келіп, түрлі зертханалар ашты. Әрине, оларға тексеріс жүргізілгені тиімсіз. Бірақ өткен жылы біз бұл ұйымдарды тексеру құқығын қайтардық. Бұрын жаңа туған нәресте қайтыс болған жағдай болды, бірақ Кәсіпкерлік кодексіне байланысты тексере алмадық. Қазір қатаң тексеру қажет деп санаймын. Тексерістер техникалық та, санитарлық та болуы тиіс», – деді Мұрат Әбенов мәжілісте журналистерге. 

Оның пікірінше, медициналық препараттарды сертификаттау мәселесіне ерекше назар аудару қажет.

«Барлық препараттардың сертификаты болғаны өте маңызды. Менің ойымша, олардың жартысында жергілікті сертификат болмауы мүмкін. Кейде сертификаттарды уақытында беріп үлгермейді. Бір аптаның ішінде болған екі өлім бұл салада үлкен бейберекетсіздік бар екенін көрсетеді», – деді ол. 

Мұрат Әбенов косметологиялық процедуралардың жастар арасында да кең таралғанын атап өтті.

«Қауіпсіз сияқты көрінетін косметологиялық процедуралардың өзі қолданылатын препараттардың құрамына байланысты үлкен қауіп төндіруі мүмкін. Анафилактикалық шок болуы ықтимал, ал мұндай жағдайда жас қызды құтқарып қалу қиын», – деді депутат. 

Еске салсақ, 15 мамыр күні Алматыдағы жеке клиникалардың бірінде пластикалық отадан кейін блогер  Сәуле Базархан қайтыс болды. Оның туыстарының айтуынша, әйел жергілікті анестезиямен жасалған жоспарлы липосакциядан кейін көз жұмған. Сондай-ақ операциядан кейін бірнеше сағат бойы науқастың жағдайы туралы ақпарат берілмегені, ал қайтыс болғаны кейін хабарланғаны айтылды.

2020 жылы осы клиникада липосакциядан кейін тағы бір жас әйел көз жұмған. Ол кезде мекеме басқа атаумен жұмыс істеген. Бұл ақпаратты денсаулық сақтау министрлігі растады.

Сол жағдайдан кейін клиника пластикалық операция жасау лицензиясынан айырылған. Алайда кейінірек иелері заңды тұлға ретінде қайтадан тіркеліп, қажетті құжаттарды қайта алып, сол мекенжайда жұмысын жалғастырған, тек атауын өзгерте салған. Белгілі болғандай, егер клиника  талаптарға сай болса, заң бұған тыйым салмайды.

Аталған факті бойынша полиция қылмыстық іс қозғап, тергеу жүргізіп жатыр. Тергеу нәтижесінде процессуалдық шешім қабылданады.

Кейінірек Ақтауда Маңғыстау облыстық мәслихатының депутаты Ербол Айтуовтың қайтыс болғаны белгілі болды. Ол иек тұсындағы артық майды алдыру үшін жеке клиникаға жүгінген және биыл 4 сәуірде тексерістен өткен соң операция жасатқан.

Алайда кейін анықталғандай, медициналық тексеру толық жүргізілмеген, ал қанындағы қант деңгейі жоғары болған. Мұндай жағдайда операция жасау ұсынылмайды. БАҚ оның жұбайының сөзін келтіріп, операция кезінде жағдайы күрт нашарлағанын хабарлады, қан қысымы мен қант деңгейі көтеріліп, инсульт алып, комаға түскен. Ербол Айтуов бір айға жуық комада жатып, есін жимастан қайтыс болды.

Тақырыпқа қатысты ұсынамыз:

• Тексеріс болады: Блогер Сәуле Базархан қайтыс болған клиникада 2020 жылы тағы бір жас әйел өмірімен қоштасқан
• Ақтауда пластикалық отадан кейін депутат қайтыс болды
• ИРСК АҚШ-тың әуе базасына соққы жасады