Тексеріс болады: Блогер Сәуле Базархан қайтыс болған клиникада 2020 жылы тағы бір жас әйел өмірімен қоштасқан

Жақында пластикалық хирургия клиникаларының бірінде блогер әрі кәсіпкер Сәуле Базарханның қайтыс болғаны халық арасында резонанс тудырды. Бұл аталған медициналық орталыққа қатысты алғашқы қайғылы жағдай емес екені белгілі болды, деп хабарлайды Orda.kz.       

2020 жылы осы клиникада липосакциядан кейін тағы бір жас әйел көз жұмған. Ол кезде мекеме басқа атаумен жұмыс істеген. Бұл ақпаратты денсаулық сақтау министрлігі растады.

Сол жағдайдан кейін клиника пластикалық операция жасау лицензиясынан айырылған. Алайда кейінірек иелері заңды тұлға ретінде қайтадан тіркеліп, қажетті құжаттарды қайта алып, сол мекенжайда жұмысын жалғастырған, тек атауын өзгерте салған. Белгілі болғандай, егер клиника  талаптарға сай болса, заң бұған тыйым салмайды.

Енді денсаулық сақтау министрлігі Сәуле Базарханның өлімінен кейін қайта тексеріс бастайды. Медициналық және фармацевтикалық бақылау комитетінің төрағасы Бауыржан Жүсіповтің айтуынша, марқұм Сәуле Базархан көз жұмды делінген пластикалық хирургия клиникасына тексеріс осы аптада басталады.

«Заң бойынша алдымен тексерісті прокуратура тіркеуі қажет. Қазір осы рәсімдер жүргізіліп жатыр, олар аяқталған соң тексерісті бастаймыз», – деді Жүсіпов. 

Бұған дейін кейбір БАҚ 2020 жылы осы клиникада липосакция кезінде төрт баланың анасы болған жас әйелдің қайтыс болғанын жазған. Ол кезде марқұмның туыстары әлеуметтік желілерде кінәлілердің жауапкершіліктен құтылып кетпеуін талап еткен. Журналистер полицияның ресми нұсқасы бойынша, өлімге дәрігерлердің кәсіби емес әрекеттері себеп болғанын хабарлаған. Кейін клиника резонансты оқиғадан соң заңды тұлға ретіде атауын өзгерткені белгілі болды.

«Бұл ақпарат расталады. Клиника бұрын да осы мекенжайда жұмыс істеген, бірақ атауы басқа болған. 2020 жылы онда липосакциядан кейін өлім фактісі тіркелген», – деді комитет басшысы. 

Оның айтуынша, сол жағдайдан кейін тексеріс басталған. Алдымен санитарлық-эпидемиологиялық бақылау басқармасы санитарлық қорытындыны кері қайтарған. Сонымен қатар Алматы қаласының медициналық және фармацевтикалық бақылау департаменті сотқа лицензияны қайтарып алу туралы талап арыз берген. Нәтижесінде клиника пластикалық операция жасау құқығынан айырылған.

Жүсіповтің сөзінше, бастапқыда лицензияны Алматы қаласының әкімдігі берген, кейін құжаттар қалалық кәсіпкерлік басқармасы арқылы қайта рәсімделген. 2021 жылдан бастап лицензия беру денсаулық сақтау министрлігінің медфармбақылау комитеті департаменті арқылы өткен.

«Осыдан кейін жаңа заңды тұлға тіркеліп, иелері жаңа талаптарға сәйкес қайта лицензия алған. Клиника сол мекенжайда жұмысын жалғастырып, тек атауын өзгерткен», – деді ол. 

Заң бойынша, егер денсаулық сақтау субъектісі барлық талаптарға сәйкес келсе, лицензия алып, медициналық қызмет көрсетуге құқылы.

Соңғы бес жылда мұндай медициналық ұйымдарға 92 жоспардан тыс тексеріс жүргізілген. Нәтижесінде лицензиялық талаптардың бұзылуы, стандарттардың сақталмауы, сондай-ақ тиісті рұқсатсыз медициналық қызмет көрсету фактілері анықталған. Әдетте мұндай тексерістер пациенттердің шағымдары немесе өлім жағдайларынан кейін басталады.

Комитет өкілдерінің айтуынша, алдағы уақытта профилактикалық бақылау күшейтіледі. Денсаулық сақтау министрлігі ақпараттық жүйелер арқылы клиникалар қызметі, рұқсат құжаттарының болуы, материалдық-техникалық жабдықталуын тексермек.

Еске салсақ, Сәуле Базарханның туыстары оның 15 мамыр күні Алматыдағы жекеменшік клиникада липосакция операциясынан кейін көз жұмғанын хабарлаған. Операция жергілікті анестезиямен жоспарлы түрде жүргізілген.

Туыстарының айтуынша, бірнеше сағат бойы дәрігерлер науқастың жағдайы туралы ақпарат бермеген, ал қайтыс болғаны кейін ғана хабарланған. 

Марқұм Сәуле Базархан оқиға болар күні жұмысынан сұранып барған. Орталыққа онымен бірге бір туысы еріп барған. Бірақ бір жарым сағатқа жоспарланған ота ұзаққа созылып, біраз уақыттан соң дәрігерлер ары-бері жүгіріп әбігерге түсе бастаған.

Сол жерде тұрған туысына ештеңе айтпаған.Тек арада үш сағат өткенде клиникадағылар жедел жәрдем шақыртады. Қаралы хабарды туыстары жедел жәрдем қызметкерлерінен естиді.

Алматыда пластикалық ота жасау кезінде қаза тапқан Сәуле Базарханның туыстары Smart Beauty Clinic клиникасының әрекетін зерттеп, қайғылы оқиғаның мән-жайын анықтауды әлі де талап етіп жатыр.

Отбасының айтуынша, оларға липосакция туралы нақты түсініктемелер мен медициналық құжаттар әлі берілмеген. Олар сондай-ақ варикоз туралы ақпаратты өлім себебі ретінде жоққа шығарады және клиниканың операцияны кімнің жасағанын анық көрсетпегенін айтады.

Оқи отырыңыз:

• Ақтауда пластикалық отадан кейін депутат қайтыс болды
• Атырауға келген Қуат Хамит айыппұл арқалап, ол қатысқан жарыста төбелес шықты
• Алматыда әл-Фараби даңғылындағы жол-көлік оқиғасы бойынша үш қылмыстық іс тергеліп жатыр