Мұхтар Ербаянның жағдайы күрт нашарлап жансақтау бөліміне түсті

Ұлттық ұланда қызмет кезінде комаға түскен 22 жастағы сарбаз Мұхтар Ербаян шұғыл түрде Ұлттық шұғыл медицинаны үйлестіру орталығына жатқызылды. Оның жағдайы күрт нашарлап, қазіргі уақытта жансақтау бөлімінде жатыр, деп хабарлайды Orda.kz.

Бұл туралы  әлеуметтік желіде сарбаздың оңалту процесімен айналысып жүрген маман мәлімдеді. Оның айтуынша, Мұхтар Ербаян қазір реанимацияда жатыр. Сонымен қатар, ата-анасы ұлының жағдайына қатысты толық ақпарат ала алмай отырғанын жеткізді.

Маманның сөзінше, әскери қызметшінің денсаулығы соңғы уақытта нашарлағандықтан, оны шұғыл түрде Ұлттық шұғыл медицинаны үйлестіру орталығына жеткізу туралы шешім қабылданған.

Еске сала кетейік, 22 жастағы Мұхтар Ербаян Ұлттық ұланда жарты жыл қызмет еткеннен кейін комаға түскен. Әскери құрылым өкілдері оқиғаны әжетханада құлап қалуымен байланыстырғанымен, сарбаздың отбасы бұл нұсқамен келіспейді.

Содан бері қазақстандықтар жігіттің тағдырын бақылап, оның отбасына қолдау білдіріп келеді. Оңалту маманы ел тұрғындарын бейжай қалмай, Мұхтарға дұға жасап, жылы лебіз білдіруге шақырды.

Оқи отырыңыз:

Комада жатқан сарбаз Ербаян Мұхтардың ісі бойынша тың деректер пайда болды

Әскерден мүгедек болып қайтқан Ербаянның жағдайы жайлы тың дерек шықты

Павлодар облысында ұшақ апатынан бір ұшқыш мерт болды