Астанадағы LRT пойыздарының жолда «тұрып қалған» себебі белгілі болды

Астанадағы LRT пойыздарының жұмысына қатысты ақаулар жолаушылардың қауіпсіздік ережелерін сақтамағанынан болды. Бұл туралы City Transportation Systems (CTS) компаниясының баспасөз қызметі мәлімдеді, деп хабарлайды Orda.kz.       

Әлеуметтік желілерде 17 мамыр күні желіге жаңа шыққан LRT пойыздары жолда «тұрып қалды» деген ақпарат пен видеолар көп тараған еді. Тасымалдаушының түсіндіруінше, бұл жоспардан тыс тоқтаулар «жолаушылардың ісі» екен.

Компания мәліметінше, сол күні Астана қаласындағы LRT желісінде бірнеше рет қауіпсіздік талаптары бұзылған. Бейнебақылау камералары мынадай жағдайларды тіркеген:

• жолаушылардың себепсіз төтенше тежеу батырмасын басқан;
• пойыз ішіндегі қорғаныш әйнектің артында орналасқан платформалық есікті шұғыл ашу батырмасын іске қосқан;
• вагон есіктерін өз бетінше ашуға әрекет жасаған;
• есіктердің жабылуына әдейі кедергі келтіріп, арасына қолдарын тыққан.

Мамандардың айтуынша, LRT жүйесі толық автоматтандырылған. Сондықтан мұндай әрекеттердің барлығы қауіп ретінде қабылданып, пойыз дереу тоқтатылып, диспетчерлік тексеру жүргізуге тура келеді.

«Бұл пойыздардың тоқтауына және қосымша тексерістерге себеп болады. Жолаушылардан LRT пайдалану ережелерін сақтауды сұраймыз. Еске саламыз, желі жоғары кернеуде жұмыс істейді. Әр құрамда арнайы оператор бар, ол қажет болған жағдайда электр қуаты ажыратылғаннан кейін есіктерді ашады» деп жазылған хабарламада. 

Компания өкілдері құқық бұзған барлық жолаушылар бейнекамералар арқылы анықталатынын атап өтті. Жиналған материалдар құқық қорғау органдарына жіберіліп, кінәлілер жауапкершілікке тартылады.

Еске сала кетейік, елордадағы LRT жобасы 16 мамыр күні ресми түрде іске қосылды. Қасым-Жомарт Тоқаев бұл оқиғаның Астана мен бүкіл Қазақстан үшін маңызын ерекше атап өтті. Президентке 001 нөмірлі алғашқы карта табысталып, ол алғашқы жолаушы ретінде «Әуежай» станциясынан «Ұлттық музей» станциясына дейін сапар жасап көрді.

Оқи отырыңыз:

• Президент Astana LRT жұмысын іске қосты
• Астанадағы LRT жүйесінің екінші желісі Қосшыға дейін тартылады
• Алматыда қаланың бас жоспары мен тұрғындар мүддесі сай келмей жатыр