Қызылорда облысында арықтан жас қыздың мәйіті табылды

Қызылорда облысында канал бойында жас қыздың мәйіті табылғанына байланысты тергеу жүргізіліп жатыр, деп хабарлайды Orda.kz облыстық полиция департаментіне сілтеп.

Алдын ала мәліметке сәйкес, 2 маусым күні кешке қыз үйінен шығып кетіп, қайта оралмаған. Туыстары оның жоғалғаны туралы хабар берген.

Құқық қорғау органдары дерегінше, мәйіттің табылғаны туралы хабар 3 маусым күні кешке аудан тұрғынынан түскен. Оқиға орнына жедел жеткен полиция қызметкерлері марқұмның жеке басын анықтады.

Аталған факт бойынша қылмыстық іс қозғалды. Тергеу аясында тәжірибелі қызметкерлерден құралған арнайы жедел-тергеу тобы құрылды.

Қазіргі уақытта құқық қорғау органдары оқиғаның барлық мән-жайын анықтау және оған қатысы бар тұлғаларды табу мақсатында кешенді жедел-іздестіру шараларын жүргізіп жатыр.

Полиция мессенджерлерде таралып жатқан оқиғаға қатысты кейбір мәліметтердің шындыққа сәйкес келмейтінін мәлімдеп, азаматтарды тексерілмеген ақпаратты таратпауға шақырды.

Сондай-ақ ведомство өкілдері сотқа дейінгі тергеу деректері жария етуге жатпайтынын атап өтті. Іс облыстық полиция басшылығының ерекше бақылауында.

Оқи отырыңыз:

• Ақтауда мүгедектігі бар 8 жастағы бала терезеден құлап мерт болды
• «Қамшымен сабап, көсеумен ұрған»: Қарағандыда асыранды 6 баланы қорлаған ерлі-зайыпты сотталды
• Әл-Фарабидегі қайғылы апат: Күдіктіні құтқармақ болғандардың өзі сотталуы мүмкін