Күйеуі ұрып, қолын сындырған: Жанжалдан кейін әйел өзіне қол салды

19 тамыз 2026 17:29 Ләззат Нұрсапақызы

Фото: nemolchikz_official

Оқиға туралы «НемолчиKZ» қоры хабарлады. Қайтыс болған әйелдің артында екі жасар егіз балалары қалды. Алматы облысының полиция департаменті жағдайға қатысты түсініктеме берді, деп хабарлайды Orda.kz.

Қайтыс болған әйелдің әпкесі қорға хабарласып, бұл істі назарға алуды сұраған.

«2026 жылғы 23 шілдеде әпкем мен оның күйеуінің арасында отбасылық жанжал болған. Сол кезде ол әпкемді ұрып, аяғымен тепкілеп, қолын сындырған. Әпкем ұялғанынан және ата-анамызды аяғандықтан бұл туралы маған ештеңе айтпаған. Қайтыс болуына бір сағат қалғанда ғана әпкем болған жағдайды айтып, екі жасар егіз балаларын басқа әпкеміздің қарауына қалдырды. 2026 жылғы 26 шілдеде ол өмірімен қоштасты. Біз істің әділ әрі объективті тергелуін талап етеміз» деп жазылған қор жариялаған жазбаға қайтыс болған әйелдің әпкесі қалдырған пікірде.

Алматы облысы полиция департаменті қайғылы оқиғаға қатысты түсініктеме беріп, өзін-өзі өлтіруге дейін жеткізу фактісі бойынша қылмыстық іс қозғалғанын хабарлады.

«Қазіргі уақытта тергеу барысында оқиғаның барлық мән-жайын анықтауға бағытталған қажетті шаралардың барлығы жүргізіліп жатыр. Іс бойынша тиісті сараптамалық зерттеулер тағайындалды», деп атап өтті ведомствоның баспасөз қызметі.

Полиция екі тараптың да келтірген барлық уәждерін тексеретінін және тергеу қорытындысы бойынша тиісті процестік шешім қабылданатынын мәлімдеді.

Бұған дейін Жамбыл облысында сегіз айлық баланың анасы өзіне қол жұмсағаны белгілі болған еді. Қайтыс болардан аз уақыт бұрын ол құрбысына «Барниге» бола шыққан жанжал кезінде күйеуі өзін ұрып-соққанын айтқан. Бұл жағдай бойынша да полиция қылмыстық іс қозғаған.

Бүгін ғана Қазақстан мұсылмандары діни басқармасының (ҚМДБ) төрағасы әрі елдің Бас мүфтиі Наурызбай қажы Тағанұлы Өтпенов әлеуметтік желіде әйелдерге қол көтеру жөнінде жазба жариялап, әйелге қол көтеру – ерлік емес деген болатын.

Оқи отырыңыз:

Жаңалықтар

барлық жаңалықтар