Бас мүфти Наурызбай қажы: Әйелге қол көтеру – ерлік емес

Еліміздегі белгілі дін қайраткері, Қазақстан мұсылмандары діни басқармасының (ҚМДБ) төрағасы әрі елдің Бас мүфтиі Наурызбай қажы Тағанұлы Өтпенов әлеуметтік желіде әйелдерге қол көтеру жөнінде жазба жариялады, деп хабарлайды Orda.kz.       

Кейде қоғамда болып жатқан кейбір оқиғаларды естігенде жүрегің ауырады. Әсіресе отбасында әйел адамның жәбір көріп, қорлыққа ұшырауы жанға батады, деп ойын білдірді Наурызбай қажы.

«Әйел – бір шаңырақтың шырағы. Біреудің аялап өсірген қызы, біреудің асыл анасы, біреудің сүйікті жары. Ол жаңа түскен шаңырағына қорғаныш пен жылулық іздеп келеді. Сондықтан ер азаматтың міндеті – оған қорқыныш емес, қамқорлық сыйлау.
Ардақты Пайғамбарымыз (оған Алланың салауаты мен сәлемі болсын): «Сендердің ең жақсыларың – отбасына жақсы болғандарың» деген. Осы бір өсиеттің өзінде үлкен мән бар» деп жазды бас мүфти. 

Сонымен қатар ол ер адамның күші жұдырығында емес екенін айтады. Нағыз күш – ашуға ерік бермей, сабыр сақтай білуде. Жаныңдағы жанды жылатпай, керісінше оған сүйеніш болуда.

«Ашу басылады. Ұрыс та ұмытылады. Бірақ ашумен көтерілген қол мен айтылған ауыр сөз адамның жүрегінде ұзақ уақытқа із қалдыруы мүмкін. Кейде сол бір сәттік ашудың өкініші өмір бойына жетеді. Отбасы – адам өзін ең қауіпсіз сезінетін мекен болуы керек. Әйел өз үйінде қорқып емес, қадірленіп өмір сүруге тиіс» деп қосты қажы. 

Ол қыз баласын аялап өсіріп, ақ босағадан үлкен үмітпен шығарып салған әрбір әке мен ананың тілегі тек «Барған жерінде бақытты болсын» сөз болады, сол аманатқа қиянат жасамайық деген ойын жеткізді.

«Әйелді жылату – азаматтық емес. Әйелге қорған болу – ердің міндеті» деп ойын аяқтады бас қажы.

Бұған дейін әлемге танымал әнші Димаш Құдайберген де әйеліне қол көтеретін ер адамдарды сынға алып, соны мақтан көретін еркектерді адамдық қасиеттен жұрдай деп атады.

Оқи отырыңыз:

• «Малсыңдар»: Димаш Құдайберген әйелін ұратын еркектерді сөкті
• Тәртіп өзгерді: Алимент түсетін арнайы шотты бұғаттауға болмайды