Көрерменсіз өткен ойын: «Қайрат» командасы «Ұлытауды» жеңді

Ойынның 90+7-минутында белгіленген пенальти «Ұлытауды» «Қайраттан» ірі есеппен жеңілуден құтқарып қалды. Алматының «Қайраты» Қазақстан чемпионатының 22-турындағы ойында Жезқазғанның «Ұлытауын» 3:1 есебімен жеңді, деп хабарлайды Orda.kz.       

Кездесу Алматыдағы Т.С.Сегізбаев атындағы академия алаңында өтті.

«Алдағы өз алаңымыздағы Премьер-лиганың 9-тур матчы 15 тамыз күні сағат 18:00-де Т.С.Сегізбаев атындағы «Қайрат» ФК Академиясының алаңында өтеді. Матчтың өту орны Орталық стадионда концерттен кейін демонтаж жұмыстары жүргізілуіне байланысты өзгертілді» деп жазылған клуб хабарламасында. 

Инфрақұрылымдық шектеу мен трибуналардың сыйымдылығы төмен болуына байланысты матч жабық режимде өтті.

«Қайрат» матчтың алғашқы минуттарынан-ақ бастаманы өз қолына алып, басымдығын голға айналдыра білді. 32-минутта Эдмилсон есеп ашты.

Үзілістен кейін алматылық команда шабуылын күшейтіп, араға көп уақыт салмай есеп айырмасын ұлғайтты. 53-минутта Ойва Юккола көзге түсіп, «Қайраттың» екінші голын соқты.

«Қайраттың» шабуылдағы ойынына 74-минутта Азмат Тұяқбаев нүкте қойып, үшінші голды соқты. Осыдан кейін кездесу алаң иелерінің ірі жеңісімен аяқталатындай көрінген. Алайда «Ұлытау» ірі есеппен жеңілмей, гол соғып үлгерді.

Қосымша берілген уақытта, яғни  90+7-минутта, жезқазғандықтар пенальти орындау құқығына ие болды. Илья Черняк 11 метрлік айып добын сәтті орындап, ойынның қорытынды есебін 3:1-ге жеткізді.

Осылайша, «Қайрат» 48 ұпай жинап, турнир кестесінде екінші орында қалды. Ал көш бастап тұрған «Ордабасының» 49 ұпайы бар және бір ойыны кем.

Ал «Ұлытау» болса 28 ұпаймен жетінші орында келеді.

Оқи отырыңыз:

• Дастан Сәтбаев жаңа маусымда «Бернли» сапында ойнайды
• Қазақстан футбол құрамасының жаңа бапкері кім?
• Дастан Сәтбаевтың бейнесі АПЛ-дың ресми сайтына қосылды: Ол «Челсиде» қала ма?