Клиника марқұм депутат Ербол Айтуовтың ісіне байланысты тың деректермен бөлісті

Әлеуметтік желілерде тараған ақпараттан кейін аты аталған клиника ресми мәлімдеме жасап, жарияланымдарда көрсетілген дәрігердің операцияға қатысы болмағанын хабарлады, деп жазады Orda.kz.

Клиника өкілдерінің мәліметінше, әлеуметтік желілерде тарап жатқан кейбір ақпараттар шындыққа сәйкес келмейді.

«Жарияланымдарда айып тағылып отырған дәрігер аталған операцияны жүргізбеген» деп жазылған мәлімдемеде.

Сонымен қатар клиника Ербол Айтуовтың отбасы мен жақындарына көңіл айтты. Бұған қоса, жекелеген жазбаларда айтылған «клиниканың лицензиясы жоқ» деген ақпарат та теріске шығарылды.

«Клиника 2015 жылғы 31 шілдеде берілген №00650DE лицензиясы негізінде жұмыс істейді. Оның ішінде анестезиология және реаниматология қызметтері де бар», деп мәлімдеді клиника.

Мекеме Медициналық және фармацевтикалық бақылау комитетінің тексеруі аяқталғанға дейін БАҚ өкілдерін, паблик әкімшілерін және әлеуметтік желі қолданушыларын тексерілмеген ақпаратты таратпауға шақырды.

Клиника өкілдері жалған ақпарат тарату Қазақстан заңнамасына сәйкес жауапкершілікке әкелуі мүмкін екенін ескертті. Сондай-ақ қажет болған жағдайда барлық деректер мен мән-жайлар құжат арқылы расталатынын мәлімдеді. 

Еске салар болсақ, Ақтауда пластикалық операциядан кейін депутат қайтыс болды. 49 жастағы Ербол Айтуов иек тұсына липосакция жасату үшін «Қасиет» клиникасына барған. 4 сәуір күні наркоз беру кезінде науқастың жағдайы күрт нашарлаған.

Оқи отырыңыз:

• Айт қарсаңында құрбандық малы айтарлықтай қымбаттады
• Тексеріс болады: Блогер Сәуле Базархан қайтыс болған клиникада 2020 жылы тағы бір жас әйел өмірімен қоштасқан