Айт қарсаңында құрбандық малы айтарлықтай қымбаттады

26 мамыр 2026 09:02 Ләззат Нұрсапақызы

Фото: Айқын

Құрбан айт қарсаңында Қазақстанда құрбандық малдарының бағасы айтарлықтай қымбаттады. Сарапшылардың айтуынша, елде мал басы көбейгенімен, жем-шөп, тасымал, күтім және базар шығындарының өсуі бағаның төмендеуіне мүмкіндік бермей отыр, деп хабарлайды Orda.kz.

2026 жылдың наурыз айының соңындағы орташа баға келесідей болды:

Сиыр – 489 300 теңге
Бұқа – 526 700 теңге
Жылқы – 581 300 теңге
Түйе – 782 000 теңге – 804 000 теңге
Қой – 77 200 теңге
Қошқар – 86 300 теңге
Ешкі – 46 300 теңге.

Алайда Құрбан айт жақындаған сайын базардағы баға бұдан да жоғарылап жатыр. Кей өңірлерде қой бағасы 100–150 мың теңгеге дейін жеткен. Ал ірі қара 630 мыңнан 945 мың теңгеге дейін сатылуда.

Биылғы басты жаңалықтардың бірі – Қазақстан мұсылмандары діни басқармасы алғаш рет бірыңғай онлайн құрбандық платформасын іске қосты. Енді қазақстандықтар үйден шықпай-ақ арнайы сайт арқылы құрбандық шала алады.

Сонымен ҚМДБ іске қосқан Qurban Muftyat платформасы арқылы:

құрбандық малын таңдау;
онлайн төлем жасау;
бір адамның немесе бірнеше адамның атынан құрбан шалу;
тапсырыс мәртебесін бақылау;
фото және видео есеп алу мүмкіндігі қарастырылған.

Онлайн жүйедегі төлем Kaspi QR арқылы жүзеге асады. Тапсырыс қабылданғаннан кейін азаматтың телефонына SMS-хабарлама келеді. Құрбандық шалынған соң фото және бейнеесеп жіберіледі.

Платформадағы кейбір өңірлер бойынша бағаларға тоқталсақ:

Астанада қой – 125 мың теңге, ірі қара – 875 мың теңге;
Алматыда қой – 120 мың теңге;
Шымкентте қой – 150 мың теңгеге дейін жеткен.

Сонымен қатар ҚМДБ мәліметінше:

қой мен ешкіні бір адам жеке шалады;
сиыр мен түйені жеті адамға дейін бірігіп шалуға болады.

Онлайн құрбандық қызметі әсіресе үлкен қалаларда тұратын, уақыты жоқ адамдарға ыңғайлы екені рас. Бұдан бөлек, шалынған ет толықтай мұқтаж отбасыларға таратылатын арнайы қайырымдылық жүйесі де қарастырылған. Мұқтаж жандар сайт арқылы өтініш бере алады.

Биыл Құрбан айт 27–29 мамыр аралығында өтеді. Құрбан айттың құрметіне — 27 мамыр демалыс күні.

Оқи отырыңыз:

Жаңалықтар

барлық жаңалықтар