«Қазмырыш» зауытындағы жарылыс неден болған?

Төтенше жағдайлар министрлігі «Қазмырыш» зауытындағы жарылыстың алдын ала себебін атады, деп хабарлайды Orda.kz.

Министр Шыңғыс Арыновтың айтуынша, жарылыстың алдын ала себебі – тау-кен жұмыстарын жүргізу кезінде технологиялық процестің бұзылуы болуы мүмкін.

Оның сөзінше, алдын ала деректер бойынша жарылыс жұмыстардың құжат талаптарын бұза отырып жүргізілуі және өндірістік процестің дұрыс ұйымдастырылмауы салдарынан болған.

«Бұған дейін бұл нысандарда өнеркәсіптік қауіпсіздік талаптарының бұзылуы анықталған. Атап айтқанда, техникалық құжаттаманың сәйкессіздігі, техникалық құрылғылардың қызмет ету мерзімін ұзартуға арналған сараптамалардың болмауы, жобалық құжаттамадан ауытқулар, өндірістік бақылаудың әлсіздігі, сондай-ақ тозған жабдықтарды уақытында алмастырылмағаны тіркелген», — деді министр үкімет отырысында. 

Тергеу аяқталғаннан кейін ТЖМ түпкілікті қорытындыларды жариялайды.

Еске салайық, 5 мамыр күні таңертең Өскемендегі «Қазмырыш» ЖШС аумағында жарылыс болған.  Төрт зардап шеккен адам ауруханаға жеткізілді, құтқарушылар үйінді астынан адамдарды іздестіруді жалғастыруда. Балқыту бөліміндегі электролиз цехында болған жарылыс салдарынан екі жұмысшы қаза тапты, тағы бес адам медициналық көмекке жүгінді. Кейінірек тағы бір адам ауруханада көз жұмды.

Оқи отырыңыз:

• «Қазмырыш» зауытындағы жарылыстан зардап шеккен адам ауруханада қайтыс болды
• «Қазмырыш» зауытындағы жарылыс: Тексеріс сараптамасы қандай?
• Өскемендегі «Қазмырыш» кәсіпорнында жарылыс: Премьер-министр тапсырма берді