Қазақстан қорықтарында 19 орман өрті тұтанды

Мемлекеттік орман табиғи резерваты Семей орманы аумағында тағы екі жаңа орман өрті тіркелді. Экология және табиғи ресурстар министрлігі мәліметінше, өрттердің шығуына найзағайдың түсуі себеп болған, деп хабарлайды Orda.kz.       

2026 жылғы 20 шілдедегі жағдай бойынша, Қазақстан аумағында Семей орманы, Ертіс орманы мемлекеттік орман табиғи резерваттары мен Баянауыл ұлттық табиғи паркі аумағында барлығы 19 орман өрті тіркелген.

20 шілде күні «Семей орманы» резерваты филиалының қала маңындағы орманшылықтың 55 және 65-кварталдарында тағы екі жаңа өрт ошағы пайда болды. Әр ошақтың аумағы шамамен екі гектар болады.

Министрлік өрт сөндірушілер хабар түскен бойда тілсіз жауды сөндіруге кіріскенін мәлімдеді.

«Өрттің одан әрі таралуына жол бермеу және оны жедел жою үшін қажетті күштер мен құралдар жұмылдырылды. Жағдай Экология және табиғи ресурстар министрлігінің тұрақты бақылауында» деп жазылған ведомство хабарламасында. 

Сондай-ақ өртті сөндіруге тікұшақ, «Қазавиаорманқорғау» күштері, «Семей орманы» қызметкерлері және Төтенше жағдайлар министрлігі бөлімшелері тартылғаны айтылды.

Бұған дейін Қазақстанда бір тәуліктің ішінде елдің әртүрлі өңірлерінде төрт орман өрті сөндірілгені хабарланған еді.

Оқи отырыңыз:

• «Семей орманы»: Құтқарушылар ашық жанып жатқан өртті тоқтатты
• «Семей орманы» аумағындағы алапат өртті сөндіруге авиация тартылды
• Бюджетке 730 миллиард теңге салық неге түспеген?