«Семей орманы» аумағындағы алапат өртті сөндіруге авиация тартылды

Абай облысында «Семей орманы» аумағында орман өрті сөндіріліп жатыр. Өртті ауыздықтау жұмыстарына авиация да жұмылдырылды, деп хабарлайды Orda.kz.

Резерват мәліметінше, өрт 16 шілде күні сағат 09:45-те Бородулиха филиалына қарасты Камышенка орманшылығының 57-орамында тіркелген.

Қазақстан Экология министрлігі хабарлауынша, өртті сөндіруге мемлекеттік орман күзетінің жеті қызметкері, автоцистерна, шағын орман өрт сөндіру кешені, трактор және су төгетін Bambi Bucket құрылғысымен жабдықталған Қазавиаорманқорғау ұшағы тартылған.

Күшейту үшін оқиға орнына қосымша екі автоцистерна, екі трактор, тағы бір шағын өрт сөндіру кешені, төтенше жағдайлар департаментінің 30 қызметкері мен сегіз техникасы, сондай-ақ орман күзетінің тағы 11 қызметкері жіберілді.

Сонымен қатар, Бөкебай ауылынан Bambi Bucket құрылғысымен жабдықталған AS350 тікұшағы және авиациялық өрт сөндіру қызметінің десантшылары ұшып шықты. Катонқарағай ауылынан Қазавиаорманқорғау мекемесінің Ми-8 тікұшағы да жолданды.

Резерваттың мәліметінше, өрт болған аймақта ауа температурасы +34 градусқа жеткен. Солтүстік-батыс желінің жылдамдығы секундына төрт метр, екпіні сегіз метрге дейін барады. Өңірде өрт қаупінің бесінші, яғни төтенше деңгейі сақталып отыр.

Қазіргі уақытта өртті оқшаулау және толық сөндіру жұмыстары жалғасуда. Семей орманы мемлекеттік орман табиғи резерватының дерегінше, жағдай бақылауда.

Оқи отырыңыз:

• Абай облысындағы «Семей орманы» алқабы тағы да отқа оранды
• Абай облысындағы өрт кезінде жоғалғандар мен қаза тапқандардың тізімі жарияланды
• Түрмедегі салық: Оралдағы колонияда қылмыстық топ құрып алған