«Семей орманы»: Құтқарушылар ашық жанып жатқан өртті тоқтатты

«Семей орманы» мемлекеттік орман табиғи резерваты аумағындағы орман өртін сөндіру жұмыстары күн-түн демей жалғасып жатыр. Өрт сөндірушілер ашық жануды жойды, деп хабарлайды Orda.kz.

ҚР Экология министрлігі мәліметінше, 17 шілде таңғы сағат 07:00-дегі жағдай бойынша өртті сөндіруге 769 адам, 191 жерүсті техникасы және 8 тікұшақ қатыстырылған.

Министрліктің хабарлауынша, барлық қызметтердің үйлесімді әрі жедел әрекеттерінің арқасында ашық жану толықтай сөндірілген.

Қазіргі уақытта жекелеген бықсыған ошақтарды жою жұмыстары жүргізіліп жатыр. Түні бойы жеке құрам өртті оқшаулау жұмыстарын жалғастырған. Өрт басталғалы бері авиация 219 рет су төгіп, өрт ошағына жалпы көлемі 474 тонна су жеткізілген.

Қазіргі уақытта орман өртін толықтай оқшаулау және жою жұмыстары жалғасуда. Экология министрлігінің мәліметінше, жағдай тұрақты бақылауда.

Бұған дейін біз Абай облысындағы «Семей орманы» резерваты аумағында орман өрті  шыққаны хабарлаған едік. Оны сөндіруге жерүсті техникасы мен авиация тартылды.

Кейін полиция «DosbolLike» лагерінен 190 бала мен 20 қызметкер эвакуацияланғанын мәлімдеді.

Сондай-ақ Премьер-министр Олжас Бектенов оқиға орнына министрлерді шұғыл түрде жіберген болатын.

Оқи отырыңыз:

• «Семей орманы» аумағындағы алапат өртті сөндіруге авиация тартылды
• Екі министр шұғыл аттанды: Абай облысындағы өрт 60 гектарды шарпыды, 220 адам эвакуацияланды