УЕФА мен оған мүше 55 ел ФИФА жарыстары мен Әлем чемпионатына бойкот жариялады

Еуропалық футбол ассоциациялары одағы (УЕФА) және ұйым құрамына кіретін 55 ұлттық футбол қауымдастығы ФИФА ұйымдастыратын барлық турнирлерге, соның ішінде Әлем чемпионатына қатысудан бас тарту туралы бірауыздан шешім қабылдады, деп хабарлайды Orda.kz.        

Бұл жөнінде УЕФА-ның ресми мәлімдемесінде хабарланды.

Мәлімдемеге сәйкес, УЕФА басшылығы ФИФА-ның коммерциялық құқықтары мен халықаралық турнирлерді басқару үлесінің бір бөлігін жеке инвесторларға беру туралы бастамасына үзілді-кесілді қарсы. Ұйым мұндай қадам футболдың тәуелсіздігіне, ашықтығына және спорттық қағидаттарға кері әсер етуі мүмкін деп есептейді.

Осыған байланысты УЕФА аталған ұсыныстар толықтай кері қайтарылып, ФИФА жеке инвесторларға үлес сатудан ресми түрде бас тартқанға дейін өз құрамындағы ешбір ұлттық құраманың ФИФА ұйымдастыратын жарыстарға қатыспайтынын мәлімдеді.

Мәліметтерге сәйкес, Еуропалық футбол одағы барлық 55 ұлттық қауымдастықтың қатысуымен шұғыл онлайн жиналыс өткізуді жоспарлап отыр. Жиында Джанни Инфантино ұсынған бастамаға бірлескен жауап талқыланбақ.

Жоспарға сәйкес, FFE ұйымы ФИФА өткізетін ең ірі турнирлердің, соның ішінде әлем чемпионатының коммерциялық құқықтары мен ұйымдастырылуын өз бақылауына алуы тиіс. Сондай-ақ, ФИФА жаңа құрылымның аз үлестерін сату арқылы 4,2 миллиард долларға дейін қаражат тартуды және ұлттық федерацияларға төленетін қаржыны айтарлықтай арттыруды көздеп отырғаны айтылады.

Ал УЕФА бұл жобаға қатаң сын айтты. Дереккөздердің мәліметінше, УЕФА-ның негізгі қысым құралы – әлем чемпионатын бойкоттау қаупі. Бұған дейін де УЕФА осындай ұстаным арқылы ФИФА-ны әлем чемпионатын әр екі жыл сайын өткізу идеясынан бас тартуға мәжбүрлеген еді.

Бұл шешім жүзеге асқан жағдайда халықаралық футбол тарихындағы ең ауқымды бойкоттардың бірі болуы мүмкін. Өйткені УЕФА құрамындағы елдер әлемдік футболдағы ең мықты құрамалардың басым бөлігін қамтиды.

Біз бұған дейін футболда әлемдік жанжал туындап,  Трамп күйеу баласы арқылы додаға қол салғанын жаздық. Бұған ФИФА басшылығының әлем чемпионаты құқықтарын жеке инвесторларға сату жоспары себеп болды. 

Соңғы кезде Джанни Инфантино әлем чемпионаттарын ұйымдастыру үшін жеке компания құрып, оның акцияларын Дональд Трамптың жақын ортасының қолдауымен сату жолдарын қарастырып жатқаны туралы ақпарат осы әлемдік дауға бастама болғаны рас.

Оқи отырыңыз:

• Футболдағы әлемдік жанжал: Трамп күйеу баласы арқылы додаға қол салды
• Футбол чемпионаты Құрылтай сайлауына байланысты кейін шегеріледі
• ӘЧ-2026: Тарихта алғаш рет әлемнің ТОП-4 құрамасы жартылай финалда