Канье Уэстің концерті өтетін күні Алматыда үш көше жабылады: Алаяқтар билет сатып жатыр

Алматыда 14 тамыз күні америкалық рэпер Канье Уэсттің концерті қарсаңында бірқатар көшелерде көлік қозғалысына шектеу енгізіледі. Өнерпаз Қазақстанда алғаш рет жартылай сфералық сахнада шоуын ұсынады, деп хабарлайды Orda.kz.       

Ұйымдастырушылардың мәліметінше, концерт өтетін күні сағат 16:00-ден 00:00-ге дейін Алматының үш көшесі жабық болады.

Канье Уэсттің концерті өтетін күні қаладағы үш учаске жабылады:

• Абай даңғылы — Мұхтар Әуезов атындағы театрдан Сейфуллин көшесіне дейін;
• Сәтбаев көшесі — Байзақовтан Сейфуллинге дейін;
• Байтұрсынов көшесі — Тимирязевтен Шевченкоға дейін.

Бұл шектеулер метро жұмысына еш әсер етпейді.

Бұған дейін құқық қорғау органдары билеттерді тек ресми сервистер арқылы сатып алуға шақырады. Төлем жасалғаннан кейін сатып алушыға ваучер беріледі, ал 13 тамыз күні ол автоматты түрде бірегей QR-коды бар электронды билетке ауыстырылады.

Полицияның мәліметінше, осы күнге дейін дайын QR-коды бар билеттер болмайды. Сондықтан «қолдан», әлеуметтік желілерде немесе мессенджерлерде сатылып жатқан мұндай билеттер алаяқтардың әрекеті болуы мүмкін.

Билеттерді қайта сату да тек ресми түрде жүзеге асырылады: ескі ваучер жойылып, жаңа иесінің атына жаңа билет рәсімделеді.

Сатылым басталған кезде билеттердің бағасы 120 мыңнан 350 мың теңгеге дейін болған. Бағасының жоғары болуына қарамастан, олар тез сатылып жатыр.

Осы концертке бола, Алматылық «Қайрат» футбол клубы еурокубоктардың үшінші іріктеу кезеңіндегі матчын Түркістанда өткізетін болды. Клубтың баспасөз қызметі матчтың ауыстырылуына америкалық рэпер Канье Уэсттің концерті себеп болғанын мәлімдеді. Концерт 14 тамыз күні Алматының Орталық стадионында өтеді.

Сонымен концерт пен еурокубок күнтізбесінің тығыздығына байланысты клуб өз матчтарын өз аренасында өткізе алмайтын болды. Соңғы күндері «Қайрат» өкілдері УЕФА-ға матч өтетін орынды өзгерту туралы өтініш жасап, Еуропалық футбол қауымдастығы бұл өтінішті мақұлдады.

Оқи отырыңыз:

• Өз стадионын Канье Уэстке қалдырып, «Қайрат» Түркістанда ойын көрсетеді
• «Қайрат» клубы мәлімдеме жасады: Канье Уэсттің концерті келісілмеген
• Символға айналған құндылық: Қазақстанда 19 мың адамға Абай есімі берілген