«Қайрат» клубы мәлімдеме жасады: Канье Уэсттің концерті келісілмеген

«Қайрат» ФК Алматыдағы Орталық стадионда Канье Уэсттің концерті өтеді деген ақпаратты жоққа шығарды,  деп хабарлайды Orda.kz.

Қайрат футбол клубының баспасөз қызметі америкалық рэпер Канье Уэст (Ye) концерті 14 тамызда Алматыдағы Орталық стадион алаңында өтеді деген ақпараттың келісілмегенін мәлімдеді.

Еске салайық, бұған дейін концерт ұйымдастырушылары әртістің Орталық стадионда өнер көрсететінін хабарлап, билет сату сервисі жуық арада сатылым бастайтынын жариялаған еді. Алайда «Қайрат» клубы аталған күнге ешқандай келісім болмағанын айтты.

Клуб мәліметінше, 8 және 15 тамыз күндері «Қайрат» Қазақстан чемпионаты аясында өз алаңында матчтар өткізуі тиіс. Сонымен қатар, 11–13 тамыз аралығында команда еурокубок шеңберінде де өз алаңында ойнауы мүмкін.

Баспасөз қызметі мұндай ауқымды концертті өткізу үшін сахнаны ұзақ уақыт құрастыру және қайта жинау қажет болатынын, бұл стадион инфрақұрылымы мен футбол алаңына қосымша жүктеме түсіретінін атап өтті. Бұл өз кезегінде аренаны матчтарға дайындауға әсер етуі ықтимал.

«Тиісті келісімдер толық аяқталғанға дейін 14 тамыздағы концерттің өтетін орны ретінде Орталық стадионды жариялау ерте», деп мәлімдеді клубтың баспасөз қызметі.

Сондай-ақ олар стадионда өтетін кез келген жаппай іс-шаралар бекітілген футбол күнтізбесін ескере отырып, барлық мүдделі тараптармен келісілгеннен кейін ғана ұйымдастырылуы тиіс екенін атап өтті.

Бұған дейін Қазақстандағы Глюкоза әншісінің гастрольдері де өтпейтіні хабарланған болатын. Алматы мен Астанада 7 және 8 ақпанға жоспарланған концерттер тоқтатылды.

Оқи отырыңыз:

• «Қайрат» футбол клубтарының әлемдік рейтингіне шықты
• Дастан Сәтбаев «Қайрат» сапындағы соңғы матчтарын өткізіп, «Челсиге» ауысады
• Не себепті Қазақстан банктері зейнеткерлерге несие беру рәсімін күрделендірді?