Не себепті Қазақстан банктері зейнеткерлерге несие беру рәсімін күрделендірді?

Соңғы кезде зейнеткерлер алаяқтардың арбауымен несие алып, ұрынып жатқаны туралы ақпарат көп тарады. Енді оларды қорғау мақсатында билік бұл рәсімді күрделендіруді шешті, деп хабарлайды Orda.kz.

Қазақстан Ұлттық банкі төрағасы Тимур Сүлейменов осал санаттағы клиенттерді несие алаяқтығынан қорғау шаралары туралы айтты. Оның сөзінше, егде жастағы адамдар — зейнеткерлер мен зейнет жасына жақындаған азаматтар үшін несие рәсімдеу кезінде банк бөлімшесіне жеке келу талабы енгізілген.

Мұндағы мақсат — банк менеджері жағдайды тікелей бағалай алуы. Егер клиент алаяқтардың ықпалында болып, не үшін несие алып жатқанын түсінбесе немесе оны телефон қоңырауынан кейін рәсімдеп жатқанын айтса, банк несие беруден бас тартуы тиіс.

«Бұл енді банк бере ме, бермей ме деген мәселе емес. Ол міндетті түрде: «Жоқ, құрметті клиент, біз сізге бұл несиені бермейміз» деуі керек. Банктер бұл талапты толық орындап жатыр ма, жоқ па — оны Қаржы нарығын реттеу және дамыту агенттігі тексереді. Банктерге тікелей бақылау жүргізетін де осы агенттік. Сондықтан бұл мәселені әріптестермен бірге жан-жақты талқылаймыз», — деді Сүлейменов. 

Оның айтуынша, жүйелі шаралар ең осал топтарды, қаржылық тәуекелдерді толық түсіне бермейтін жастарды және алаяқтарға оңай алданатын егде жастағы азаматтарды қорғауға бағытталған.

Оқи отырыңыз:

• Алматының шыжыған ыстығы 50 жыл бұрын тіркелген температура рекордын жаңартты
• Ақтөбе облысында есірткі сатты деген күдікпен екі полицей ұсталды
• «Семей орманы» аумағындағы алапат өртті сөндіруге авиация тартылды