Энергетика министрлігі: КҚК мен жүк жөнелтушілер арасында тұрақты байланыс орнатылды

Қазақстанның Энергетика министрлігі Каспий құбыр консорциумы (КҚК) жұмысының толық тоқтағаны туралы ақпаратты жоққа шығарды, деп хабарлайды Orda.kz.        

Бұл мәлімдеме мұнай тасымалдайтын танкерлерге дрондар шабуылынан кейін таралған ақпаратқа қатысты жасалды.

Ведомство мәліметінше, кейбір бұқаралық ақпарат құралдарында КҚК жұмысы толық тоқтауы мүмкін деген ақпарат тараған. Алайда министрлік мұндай сценарий қарастырылып отырмағанын атап өтті. Тек 31 шілде күні Каспий құбыр консорциумы мұнай құбырының жұмысы уақытша тоқтатылған.

Сонымен қатар, министрлік мұнай қабылдау және резервуарларға жинақтау процесі жалғасып жатқанын мәлімдеді. Министр кеңесшісі Әсел Серікбаеваның айтуынша, 1 тамыздан бастап тәулігіне 100 мың тонна мұнай қабылданып жатыр. Ал тасымал көлемінің артуы теңіз терминалында танкерлерді уақтылы тиеуге байланысты болады.

Министрлік қазіргі жағдайдың бақылауда екенін және КҚК мен жүк жөнелтушілер арасында тұрақты байланыс орнатылғанын жеткізді.

Бұған дейін сарапшылар Новороссийск маңындағы теңіз терминалына жасалған шабуылдардан кейін кеме иелері танкерлерді жіберуге қауіптеніп отырғанын айтқан еді. Осыған байланысты Қазақстанға мұнай өндіру көлемін азайту қажет болуы мүмкін деген болжамдар бар.

Айта кетейік, шілде айының соңында Каспий құбыр консорциумы мұнай қабылдау мен оны Новороссийскідегі теңіз терминалы арқылы жөнелтуді қайта бастаған. Алайда 30 шілдеге қараған түні сол терминал маңында дрондар екі мұнай танкеріне қайтадан шабуыл жасады.

Оқи отырыңыз:

• КҚК теңіз терминалына дрондар шабуыл жасады: Мұнай тиеу уақытша тоқтатылды
• «Теңізшевройл» мұнайы тиелген танкер КҚК терминалы маңында шабуылға ұшырады
• КҚК Новороссийск арқылы мұнай жөнелтуді қайта бастады