Израиль мен Ливан өзара бітімді 45 күнге ұзартты

16 сәуірде екі ел алғаш рет 10 күндік атысты тоқтату туралы келісімге келген болатын. Кейін бұл келісім бірнеше рет ұзартылды. 14–15 мамыр күндері АҚШ-та өткен келіссөздерден кейін Израиль мен Ливан бітімді тағы 45 күнге ұзартуға шешім қабылдады, деп хабарлайды Orda.kz.

Бұл туралы X әлеуметтік желісінде АҚШ Мемлекеттік департаментінің өкілі Томми Пиготт мәлімдеді.

«16 сәуірдегі атысты тоқтату режимі алдағы ілгерілеуді қамтамасыз ету үшін 45 күнге ұзартылатын болады», – деді ол. 

Келіссөздер 2 және 3 маусымда қайта жалғасады деп күтілуде.

«Бұл талқылаулар екі ел арасында берік бейбітшілік орнатуға, бір-бірінің егемендігі мен аумақтық тұтастығын толық мойындауға және ортақ шекара бойында шынайы қауіпсіздік қалыптастыруға ықпал етеді деп үміттенеміз», – деп түйіндеді Пиготт. 

Айта кетейік, бітім жарияланғаннан бері Израиль мен Ливан бір-бірін келісімді бірнеше рет бұзды деп айыптап келеді. Бұған дейін Израиль өздерінің Ливанмен емес, Ливан аумағындағы «Хезболла» тобымен соғысып жатқанын бірнеше рет мәлімдеген еді.

Оқи отырыңыз:

• «Өтелмеген парыз»: Қазақстанның Ауғанстанға көрсеткен гуманитарлық көмегі туралы фильм жұртты толқытты
• АҚШ Иранның қақтығысты реттеу жөніндегі 14 тармақты жоспарын қабылдамады
• Кәмелетке толмаған төрт жасөспірім терроризм туралы жалған хабарлама үшін ұсталды