АҚШ Иранның қақтығысты реттеу жөніндегі 14 тармақты жоспарын қабылдамады

АҚШ Иранның қақтығысты реттеу жөніндегі 14 тармақтан тұратын жоспарын қабылдамады.Тегеранның мәлімдеуінше, Вашингтон ядролық бағдарлама мәселесінде тағы да «қысым көрсетуді» ұстанған, деп хабарлайды Orda.kz.

Иранның Tehran Times газеті өзінің Telegram-арнасында АҚШ Иран ұсынған қақтығысты реттеу және соғысты тоқтату жөніндегі 14 тармақтан тұратын жоспарды қабылдамағанын хабарлады.

Иран наурыздың басында АҚШ-қа 14 тармақтан тұратын бейбіт жоспар  жолдаған болатын.

Басылымның мәліметінше, Вашингтон Тегеранға жазбаша жауап жолдап, онда иран тарабының барлық ұсыныстарын кері қайтарған.

«Тегеранның ұсыныстарын қабылдамай, АҚШ тағы да өзінің қысым көрсету ұстанымын растады, әсіресе ядролық мәселе бойынша» деп жазды газет. 

Иранның ұсынысы екі кезеңнен тұратын келіссөздер процесіне негізделген. Бірінші кезеңде барлық майдандағы әскери әрекетті тоқтату көзделген, ал Тегеран қойған шарт орындалғаннан кейін келіссөздердің екінші кезеңіне — Иранның ядролық бағдарламасына арналған талқылауға көшу жоспарланған.

Вашингтон тарабы ресми растаған да жоқ, Иран жоспарының мәтінін жариялаған да жоқ.

Бұған дейін Иран өз жауабын АҚШ ұсыныстарына байланысты тараптар арасындағы келіссөзде делдал болып отырған Пәкістан арқылы жібергені хабарланған еді.

АҚШ президенті жуырда Иран ұсыныстарын сынап, Тегеран «ойын ойнап отыр» деп мәлімдеді. Америкалық БАҚ-тың хабарлауынша, АҚШ әкімшілігі ықтимал келісімнің негізгі шарты ретінде Иранның ядролық бағдарламасына қатысты шектеулерді талап етуді жалғастырып отыр.

Бұған дейін  Иран Қытай кемелерінің Ормуз бұғазы арқылы өтуін жеңілдеткені туралы хабарлаған болатынбыз.

Оқи отырыңыз:

• Иран келіссөздерді қайта бастау үшін АҚШ-қа бес талап қойды
• Иран Ормуз бұғазы арқылы Қытай кемелерінің өтуіне рұқсат берді
• Иран АҚШ-қа 14 тармақтан тұратын бейбіт жоспар жолдады