Исламтанушы ел ішінде арандатушы уағызшылар көбейгенін айтты

Исламтанушы Тимур Әлиев соңғы күндері қоғамда қызу талқыланған бірнеше резонансты оқиғаға пікір білдіріп, бұл жағдайлардың барлығы Қазақстанда дін атынан сөйлейтін, алайда ресми діни құрылымға қатысы жоқ әрі діни білімі жеткіліксіз адамдардың көбейіп кеткенін көрсететінін айтты, деп хабарлайды Orda.kz.

Оның сөзінше, кейбір ақпарат құралдары мен әлеуметтік желідегі парақшалар мұндай адамдарды «имам», «діни өкіл» немесе «уағызшы» ретінде көрсетіп, қоғамды шатастырып отыр. Тимур Әлиев мұны хайп қуудың бір көрінісі деп бағалады.

Исламтанушының айтуынша, сұхбатынан кейін қоғам талқысына түскен Құрбанәлі Ахметовті ресми дін өкілі ретінде көрсетуге болмайды. Ол бұл адамның ешқандай қырынан ресми дін басыларына жатпайтынын, сондықтан оның пікірін исламдағы ресми ұстаным немесе имамдардың көзқарасы ретінде қабылдау дұрыс еместігін атап өтті. Сондай-ақ,  мұндай адамдардың интернеттегі көптеген мәлімдемелері қате, жаңсақ әрі әһлі сүннет сеніміне қайшы келеді. Сондықтан олардың қоғам алдында дін атынан сөйлеуі қауіпті. Осыған байланысты ол Құрбанәлі Ахметовтің әкімшілік жауапкершілікке тартылуын орынды шешім деп бағалады.

Наурыз туралы даулы мәлімдеме

Тимур Әлиев соңғы күндері талқыланған тағы бір жағдайға да тоқталды. Бұл — Наурыз мерекесі туралы даулы пікір айтқан азаматтың ісі. Оның сөзінше, кейбір адамдар қазақ халқының тарихы мен мәдениетін жоққа шығарып, қоғамда дау туғызатын мәлімдемелер жасайды. Мұндай әрекет халықтың дәстүрі мен рухани мұрасына құрметсіздік танытумен тең.

Исламтанушы бұл оқиғаға байланысты тиісті органдар назар аударуы керек екенін айтады. Ол мұндай даулар тек діни сауатсыздықтан ғана емес, сонымен бірге халықтың тарихы мен дүниетанымын түсінбеуден туындайтынын айтты.

Тимур Әлиев өз сөзінде соңғы күндері салафиттік бағыттағы тағы бір уағызшының Қылмыстық кодекстің 174-бабы бойынша, яғни әлеуметтік және діни алауыздықты қоздыру фактісімен қылмыстық жауапкершілікке тартылғанын да атап өтті. Оның пікірінше, қоғамда іріткі салатын, діни араздықты күшейтетін және адамдарды шатастыратын мұндай әрекеттердің жолы кесілуі керек.

Ол мұндай тұлғалардың қызметін дер кезінде тоқтату маңызды екенін айтып, дін мәселесінде радикалды, қате немесе арандатушылық сипаттағы пікірлерге бейжай қарауға болмайтынын ескертті.

Тимур Әлиевтің айтуынша, Қазақстандағы үлкен проблемалардың бірі — діннен терең білімі жоқ адамдардың шариғат, ахкам және сенім мәселелері жөнінде сөйлеуі. 

«Діни сұрақтар туындаған жағдайда әлеуметтік желідегі даулы тұлғаларға емес, жергілікті имамдарға жүгіну қажет.  Діни мәселелерді ресми діни өкілдерден сұрап, сенімді дереккөзге сүйену қажет», — деді исламтанушы.

Ол мұндай жағдай тек діни ортада ғана емес, медиа кеңістігінде де жиілеп кеткенін айтты.

Оқи отырыңыз:

• Алматы полициясы әйелдерін «сыйға тарта салатын» имамды жазалады
• Қарақшылар 3 минут ішінде Италиядағы музейді тонап кетті
• Ресейдің Усть-Луга вахталық кентіндегі төбелесте 10 қазақстандық ұсталып, үшеуіне қатысты тергеу басталды