Иран СІМ: Еуроодақтың өзі АҚШ пен Израильдің әскери қылмыстарын қолдап отыр

Иранның сыртқы істер министрлігі еуродипломатия басшысы Кая Калластың Ормуз бұғазын ашу туралы талабын «екіжүзділіктің шыңы» деп атағанын  Orda.kz хабарлайды.      

Бұл туралы Иран СІМ-нің ресми өкілі Исмаил Багаи X әлеуметтік желісінде мәлімдеді.

«Ақыл айтуды доғарыңдар, Еуропаның өзі уағыздайтын қағидаларды іс жүзінде жүзеге асыра алмауы оның «халықаралық құқық» туралы сөздерін нағыз екіжүзділікке айналдырды» деп жазды ол.

Дипломаттың айтуынша, халықаралық құқықтың ешбір нормасы Иранға Ормуз бұғазын ислам республикасына қарсы әскери агрессия мақсатында пайдаланудың алдын алу үшін қажетті шаралар қабылдауға тыйым салмайды.

«Ал Ормуздағы «шартсыз транзит» ше? Бұл ұғым америкалық-израильдік агрессия салдарынан аймақта АҚШ әскери күштері орналастырылған сәтте-ақ жойылған», – деп түсіндірді Багаи. 

Ол сондай-ақ Еуроодақтың өзі АҚШ пен Израильдің әскери қылмыстарын қолдап отырған кезде Иранға халықаралық құқықты сақтау жөнінде ақыл айтуға құқығы жоқ екенін атап өтті. Сонымен қатар ол Трамп қоғам пікірін бұрмалап жеткізетінін айтып, «ақылгөйсуді доғарыңдар» деді.

Жұма күні өткен онлайн кездесуде еуродипломатия басшысы Кая Каллас халықаралық құқыққа сәйкес Ормуз бұғазы сияқты су жолдары арқылы транзит барлық елдер үшін ашық әрі тегін болуы тиіс екенін мәлімдеген еді.

Бұған дейін ислам республикасы 8 сәуірде жарияланған бітім мерзімі аяқталғанға дейін барлық коммерциялық кемелерге Ормуз бұғазы арқылы өтуге рұқсат берген. Бұл Ливанда атысты тоқтату туралы келісімге қол жеткізілген тұс еді.

АҚШ президенті Дональд Трамп өз кезегінде тараптар бейбіт келісімге қол жеткізбейінше Иран порттарына қойылған блокаданы алып тастаудан бас тартты. Ол Тегеран Ормуз бұғазын енді жаппауға уәде беріп, болашақ келісімнің барлық шарттарын, соның ішінде ядролық бағдарламаны тоқтатуды қабылдады деп мәлімдеген.

Алайда Иран парламентінің өкілі Мохаммад-Багер Ғалибаф бұл мәлімдемелерді жоққа шығарып, АҚШ президентін ақпараттық соғыс жүргізіп, қоғамдық пікірді манипуляциялады деп айыптады.

Сонымен Иран бұғазға қатысты әскери бақылау режимін қайта енгізгенін хабарлады. Иран Ислам революциясы сақшылар корпусының әскери-теңіз күштері Ормуз бұғазына жақындаған кемелер «жаумен ынтымақтас» ретінде бағаланатынын ескертті.

Еске салсақ, 17 сәуірде Иран бұғазды коммерциялық кемелер үшін ашқан болатын, алайда АҚШ Иранға қарсы теңіз порттарының блокадасы жалғасатынын мәлімдеген соң қайта жауып тастады.

Оқи отырыңыз:

• Ормуз ашылды, бірақ қысым сақталады: Иран, Трамп және мұнай нарығы қалай өзгерді?
• Иран Ормуз бұғазының қайта жабылғанын мәлімдеді
• Иранның Ормуз бұғазын аша алмау «себебі» белгілі болды