Ормуз ашылды, бірақ қысым сақталады: Иран, Трамп және мұнай нарығы қалай өзгерді?

Иран сыртқы істер министрлігі Ормуз бұғазының уақытша ашылғанын мәлімдеді. Бұл шешім Ливандағы атысты тоқтату режимі кезеңінде барлық коммерциялық кемелерге қатысты болмақ. Бұған дейін әлемдік мұнай тасымалының маңызды бөлігі өтетін стратегиялық бұғазға шектеу қойылуы мүмкін деген қауіп болған еді. 

Жаңалыққа мұнай нарығы бірден реакция білдірді: Brent маркалы мұнай бағасы наурыз айының басынан бері алғаш рет барреліне 90 доллардан төмен түсті. Сарапшылар мұны жеткізілім тәуекелдерінің азаюымен байланыстырады.

АҚШ президенті Дональд Трамп Ормузды «Иран бұғазы» деп атап, Тегеранға оны ашқаны үшін алғыс білдірді. Сонымен қатар, ол АҚШ Иран порттарына қатысты теңіз блокадасын жалғастыратынын айтты. Оның сөзінше, бұл шектеулер толыққанды бейбіт келісім жүзеге асқанға дейін сақталады.

Трамп сондай-ақ Израильге Ливан аумағына соққы жасамауды тапсырғанын мәлімдеді. Алайда Ливан медиасы атысты тоқтату режимі бұзылғанын хабарлап үлгерді.

Осылайша, Ормуз бұғазының ашылуы қысқа мерзімді тұрақтандыру факторы болғанымен, аймақтағы геосаяси шиеленіс толық бәсеңдеді деуге әлі ерте.

Оқи отырыңыз:

• АҚШ Сириядан өз әскерін толық шығарды
• Ливан Израиль бітімді бұзғанын мәлімдеді