Иран Армения арқылы өтетін «Трамп дәлізіне» қарсылығын ашық айтты

Иран Ислам Республикасының Жоғарғы көшбасшысының кеңесшісі Али Акбар Велаяти Кавказ аймағында АҚШ-тың дәліз құруына жол бермейтінін, бұл жағдайда Ресейдің Тегеранмен одақтас болу-болмауы маңызды емес екенін мәлімдеді, деп хабарлайды Orda.kz Tasnim агенттігіне сілтеп.

Велаятидің айтуынша, бұл жоба Оңтүстік Кавказ аймағының тұрақтылығына қауіп төндіреді, сондықтан Иран оны жүзеге асыруға барынша қарсы тұрады.

«Иран Оңтүстік Кавказ қауіпсіздігін қамтамасыз ету жолында Ресеймен де, онсыз да әрекет ете беретінін нақты білдіреді», –деді ол. 

Сондай-ақ, кеңесші Иран мен Ресей Зангезур дәлізінің АҚШ пен НАТО бақылауына өтетініне қарсы екенін, себебі бұл екі ел арасындағы ынтымақтастықты әлсіретуді көздейтінін айтты.

Сонымен қатар, ол Әзірбайжан Иран аумағы арқылы Нахичеваньмен қосыла алатынын, осылайша даулы бағытты айналып өтетінін айтты.

9 тамызда Вашингтонда Трамптың делдалдығымен Армения премьер-министрі Никол Пашинян мен Әзірбайжан президенті Ильхам Әлиев екі ел арасындағы бейбіт қарым-қатынастар туралы декларацияға қол қойды.

Тоқаев Баку мен Ереван арасындағы бейбітшілік туралы келісімді тарихи маңызды жетістік деп атады.

Құжаттың басты тармақтарының бірі — Әзірбайжан мен оның эксклавы Нахичевань арасында Арменияның Иранмен шекаралас бөлігінен өтетін көлік дәлізін құру.

Бұл жаңа бағыт «Халықаралық бейбітшілік пен өркендеу үшін Трамп дәлізі» деп аталды. Келісімге сәйкес, АҚШ бұл жобаны 99 жыл бойы іске асыру құқығына ие болады.

АҚШ президенті Дональд Трамп Ресей президенті Владимир Путинмен биылғы 15 тамызда Аляскада кездесетінін жариялады.