Армения мен Әзірбайжан Вашингтонда бейбітшілік туралы декларацияға қол қойды

Вашингтонда АҚШ президенті Дональд Трамптың арағайындығымен Армения премьер-министрі Никол Пашинян мен Әзірбайжан президенті Ильхам Әлиев екі ел арасындағы бейбіт қарым-қатынастар туралы декларацияға қол қойды, деп хабарлайды Orda.kz.

Құжатта тараптардың бұған дейін келісілген бейбіт келісімді бекіту мен ратификациялау жолында ілгерілеу міндеттемесі, сондай-ақ әскери қақтығыстардан бас тарту, бір-бірінің егемендігі мен аумақтық тұтастығына құрмет көрсету мәселелері бекітілген.

Декларацияға қол қойылар алдында Армения мен Әзірбайжанның сыртқы істер министрлері бейбітшілік пен мемлекетаралық қатынас орнату туралы келісім мәтінін қарап шығып, оның мазмұнын мақұлдады.

Құжаттың негізгі тармақтарының бірі — өңірдегі көлік қатынастарын ашу және Әзірбайжанның негізгі аумағы мен оның анклавы Нахичеванды Арменияның Иранмен шекаралас бөлігіндегі аумақ арқылы байланыстыратын көлік дәлізін құру.

Жаңа бағытқа «Халықаралық бейбітшілік пен өркендеуге арналған Трамп дәлізі» атауы берілді. Бұл дәліз Әзірбайжан мен Нахичеван арасында тікелей қатынасты қамтамасыз етіп, Бакудің Түркиямен байланысын нығайтады әрі өңірдегі инфрақұрылымдық дипломатияның бір бөлігіне айналады. Ақ үйдің баспасөз хатшысы Анна Келлидің айтуынша, бұл дәліз Арменияның егемендігі мен аумақтық тұтастығына толық құрмет көрсету аясында жұмыс істейтін болады.

Әзірбайжан мен Нахичеванды 32 шақырымдық армян аумағы бөліп тұр. Жобаны іске асыру адамдар мен жүктердің еркін қозғалысын қамтамасыз етіп, өңірдегі экономикалық интеграцияны арттыруға мүмкіндік береді. Келісімге сәйкес, АҚШ бұл жобаны жүзеге асыру құқығына 99 жыл мерзімге жекелей ие болады.