Трамп пен Путин 15 тамызда Аляскада кездеседі

АҚШ президенті Дональд Трамп Ресей президенті Владимир Путинмен алдағы кездесу өтетін күн мен орынды жариялады, деп хабарлайды Orda.kz.

Бұл Трамптың Ақ үйге қайта оралғаннан кейін екі көшбасшының алғашқы бетпе-бет кездесуі болмақ. АҚШ Халықаралық қылмыстық соттың юрисдикциясын мойындамайды, ал ол бұған дейін Ресей президентіне қамауға алу туралы ордер берген болатын.

«Америка Құрама Штаттарының президенті ретінде мен және Ресей президенті Владимир Путин арасындағы көптен күткен кездесу келесі жұма, 2025 жылдың 15 тамызында, Аляска штатында өтеді. Толығырақ кейінірек хабарланатын болады. Осы тақырыпқа көңіл бөлгендеріңізге рақмет!»  деп жазды Трамп Truth Social әлеуметтік желісінде. 

Кремль алдағы келіссөздерді растады. Ресей президентінің көмекшісі Юрий Ушаков кездесу орны ретінде Алясканың таңдалуын елдердің географиялық жақындығымен және аймақтағы, соның ішінде Арктикадағы, экономикалық мүдделерінің тоғысуымен түсіндірді.

Мәскеу келесі кездесу Ресей аумағында өтеді деп үміттенеді, Трампқа шақыру да берілген.

Ушаковтың айтуынша, күн тәртібінде бірлескен жобаларды жүзеге асыру мүмкіндіктері мен жаһандық және өңірлік қауіпсіздік мәселелері талқылануы мүмкін. Бұл Владимир Путиннің 2015 жылы БҰҰ Бас Ассамблеясына қатысқаннан кейінгі АҚШ-қа алғашқы сапары әрі Ресей көшбасшысының Аляскаға жасайтын тарихтағы алғашқы ресми сапары болады.