Иран АҚШ-пен бейбіт келіссөздер барысында жаңа ұсыныс жолдады

Кеше Иранның мемлекеттік бұқаралық ақпарат құралдары Иранның Пәкістанның делдалдығымен АҚШ-қа келіссөздер туралы жаңа ұсыныс жібергенін мәлімдеді, деп хабарлайды Orda.kz.      

Дегенмен оның толық мазмұны туралы ешқандай ақпарат берілген жоқ.

«Бейсенбі күні кешке Иран Ислам Республикасы АҚШ-пен келіссөздерде делдал ретінде әрекет ететін Пәкістанға өзінің соңғы ұсынысының мәтінін тапсырды» деп хабарлады IRNA ресми ақпарат агенттігі. 

Жаңа ұсыныстың нақты нені қамтитыны әзірге белгісіз, алайда бұл жаңалық жарияланғаннан кейін Иран Ормуз бұғазын бұғаттаған сәттен бері күрт өскен әлемдік мұнай бағасы төмендеді, деп жазады Reuters.

Ақ үй Иран ұсынысына қатысты сұрақтарға жауап беруден бас тартып, жабық дипломатиялық келіссөздерге түсініктеме бермейтінін мәлімдеді.

Иран СІМ мәлімдеуінше, жұма күні елдің сыртқы істер министрі Аббас Арагчи Сауд Арабиясы, Катар, Түркия, Ирак және Әзербайжан әріптестерімен телефон арқылы сөйлесіп, «соғысты тоқтатуға бағытталған Ислам Республикасының соңғы бастамаларын» талқылады.

Еске салсақ, АҚШ пен Иран арасындағы келіссөздердің алғашқы раунды сәуір айының ортасында өтіп, нәтижесіз аяқталды.

Содан бері келіссөздер тұйыққа тірелді: АҚШ Иран порттарына теңіз блокадасын енгізді, ал Иран Ормуз бұғазын бұғаттауды жалғастырды — соғысқа дейін ол арқылы әлемдік мұнай мен газ тасымалының шамамен 20%-ы, сондай-ақ көптеген өзге де құнды химиялық өнімдердің транзиті өтетін.

8 сәуірден бері атысты тоқтату режимі күшінде, алайда бейсенбі күні АҚШ президенті Дональд Трампқа Иранды келіссөз үстеліне отырғызуға бағытталған жаңа әскери соққылар жоспары туралы баяндалуы мүмкін деген хабарлар әлемдік мұнай бағасының уақытша төрт жылдағы ең жоғары деңгейге көтерілуіне себеп болды.

Оқи отырыңыз:

• Трамп ирандықтармен кездесу барысында тағы құбылып, делегация жібермейтін болды
• Ақ үй Уиткофф пен Кушнердің Пәкістанға бет алғанын растады
• Иран АҚШ пен Израильден өтемақы талап етпек