Хабиб Нурмагомедов Ақтауда: полицейді итерген кәсіпкер қамауға алынды

Әлеуметтік желіде Хабиб Нурмагомедовтың Ақтауда жанкүйерлерімен кездесуі кезінде ақ көйлек киген ер адам полиция формасын киген адамды итергені түсіп қалған видео қызу талқыланып жатыр. Ең қызығы, мұндай әрекетке облысқа белгілі кәсіпкер Арман Тоғаев жол берген.

Тоғаев Маңғыстау облысы ІІД бастығының орынбасары, полиция полковнигі Амангелді Халмұрадовты итеріп жіберген. Тоғаев қамауға алынды.

«Бейнежазбадағы адамның жеке басы анықталып, ол Ақтау қалалық полиция бөліміне жеткізілді. Оған қатысты ҚР ӘҚБтК-нің 434-бабының 1-бөлігі (ұсақ бұзақылық) бойынша әкімшілік хаттама толтырылды. Материал әкімшілік сотқа жолданды. Әкімшілік соттың қаулысымен 10 тәулікке қамауға алу туралы шешім қабылданып, Ақтау қаласының арнайы қабылдау бөліміне қамауға алынды» деп хабарлады Маңғыстау облысы әкімдігінің баспасөз қызметі.

Еске салсақ, 16 шілдеде Ақтауда аралас жекпе-жектен халықаралық турнир өтіп, оған UFC чемпионы Хабиб Нурмагомедов шақырылды. Турнирді ұйымдастырушылардың бірі – Арман Тоғаев.