Германиядағы кинофестивальді қазақстандық фильм ашады

Қазақстандық режиссер Әділхан Ержановтың «Сары мысық» фильмі Орталық және Шығыс Еуропадағы 21-шы GoEast кинофестивалін ашады.

Бұл туралы Orda.kz хабарлады.

Іс-шара 2021 жылдың 20-26 сәуірі аралығында онлайн режиміде Германияның Висбаден қаласында өтеді.

«Сары мысықтың» басты кейіпкері - өзінің бұрынғы қылмыстық өмірін мәңгілікке қалдырып, тауда кинотеатр салуды армандайтын Кермек есімді жігіт.

Сондай-ақ, фестиваль аясында Әділхан Ержановтың тағы екі фильмі - «Бақытжамал» қысқаметражды фильмі мен байқау бағдарламасында ұсынылған «Ұлболсын» фильмі көрсетіледі. Биылғы жылы фестивальге барлығы 92 фильм қатысуда.

GoEast кинофестивалін 2001 жылы Неміс кино институтының директоры Клаудия Диллман құрды. Фестивальдің негізгі міндеттері - Орталық және Шығыс Еуропа елдерінің мәдени дамуы туралы білім деңгейін арттыру, сонымен қатар әртүрлі кинематографиялық мектептер арасындағы диалогты тереңдетуге үлес қосу. 2017 жылдан бастап фестивальді Хелен Герритсен басқарады.